Në mbledhjen e fundit, Bordi vendosi të rrisë çmimin e pakicës me 6 lekë për litër, duke e çuar në 124 lekë. Megjithatë, ndikimi real i rritjes u amortizua pjesërisht nga hyrja në fuqi e uljes së akcizës me 20%, që uli çmimin final me rreth 9.4 lekë për litër. Pa këtë ndërhyrje fiskale, çmimi do të kishte arritur në 133.4 lekë për litër.
Përllogaritja e çmimit është bërë mbi bazën e të dhënave të bursës ndërkombëtare Platts, sipas të cilave Gazoil (FOB) arriti në 1,572 dollarë për ton, me një rritje të fortë prej rreth 200 dollarësh brenda një dite. Me shtimin e premios prej 30 dollarësh për ton, vetëm çmimi i blerjes përllogaritet në rreth 113 lekë për litër.
Në këtë strukturë, pesha kryesore mbetet te taksat, të cilat arrijnë në 95.9 lekë për litër pas uljes së akcizës, ndërsa do të ishin 105.4 lekë nëse ajo nuk do të ishte ndryshuar. Këtyre u shtohen edhe marzhet e fitimit, 3 lekë për shumicën dhe 12 lekë për pakicën, që përfshijnë kostot operative si transporti, pagat dhe taksat vendore.
Në total, taksat përbëjnë rreth 43% të çmimit final, një nivel që mbetet pothuajse i pandryshuar edhe pas ndërhyrjes me akcizën, duke treguar se ndikimi real në çmim është i kufizuar.
Megjithatë, debati kryesor lidhet me vetë formulën. Importuesit kundërshtojnë përdorimin e çmimit FOB, që nuk përfshin transportin dhe sigurimin, duke kërkuar që referencë të merret çmimi CIF, i cili sipas tyre rrit koston reale të blerjes me 45 deri në 50 dollarë për ton.
Sipas tyre, çmimi përfundimtar përcaktohet në momentin kur produkti hidhet në treg dhe jo në momentin e importit, pasi faturimi bëhet mbi bazën e çmimit të ditës në bursë. Kjo praktikë, sipas importuesve, duhet të reflektohet edhe në formulën e Bordit.
Bordi ka kërkuar verifikimin e kontratave dhe ka lënë të hapur mundësinë për rishikim të formulës në mbledhjen e radhës. Nëse do të merret si referencë çmimi CIF, përllogaritjet tregojnë se çmimi final i pakicës mund të rritet edhe me 4 deri në 5 lekë për litër.
Vendimi i ardhshëm pritet të përcaktojë nëse formula do të ndryshojë dhe nëse çmimet do të reflektojnë një nivel edhe më të lartë në treg.
