Autoritetet në SHBA kanë mbyllur zyrtarisht një çështje të hapur prej më shumë se pesë dekadash, pasi teknologjia moderne e ADN-së konfirmoi identitetin e një adoleshenteje si viktimë e një prej vrasësve serialë më famëkeq në histori.
Zyra e Sherifit të Qarkut Utah njoftoi se 17-vjeçarja Laura Ann Aime, e zhdukur në tetor të vitit 1974, është identifikuar përfundimisht si viktimë e Ted Bundy-t.
E reja ishte larguar nga një festë në natën e Halloween-it dhe u raportua e zhdukur. Trupi i saj u gjet rreth një muaj më vonë nga disa alpinistë në një zonë malore.
Sipas autoriteteve, testimet e reja të ADN-së konfirmuan “pa asnjë dyshim” praninë e materialit gjenetik të Bundy-t në provat e mbledhura nga vendngjarja.
Megjithëse Bundy kishte pranuar më parë vrasjen e saj para ekzekutimit në vitin 1989, ai nuk kishte dhënë detaje mbi krimin. Për këtë arsye, hetuesit e mbajtën çështjen të hapur deri në sigurimin e provave përfundimtare.
“Ky rast tashmë është zyrtarisht i mbyllur”, deklaroi sherifi i Qarkut Utah, Mike Smith, gjatë një konference për shtyp.
Ted Bundy vrau të paktën 30 gra midis viteve 1974 dhe 1978, ndërsa dyshohet për shumë më tepër viktima në disa shtete amerikane.
Në kohën e zhdukjes së Aime, ai jetonte në Salt Lake City dhe studionte drejtësi në Universitetin e Utah.
Bundy ishte i njohur për mënyrën se si fitonte besimin e viktimave në vende publike, shpesh duke u paraqitur si i dëmtuar ose duke përdorur sharm personal, përpara se t’i çonte në zona të izoluara.
Autoritetet theksuan se, nëse Bundy do të ishte ende gjallë sot, ai do të përballej me dënimin maksimal.
Rasti i Laura Ann Aime mbyllet kështu pas 51 vitesh, duke i dhënë familjes dhe komunitetit një formë të vonuar drejtësie për një nga krimet e pazgjidhura më të vjetra në Utah.
