Agjencia e Mbikëqyrjes Policore ka arrestuar Edmond Ruçin, oficer të policisë gjyqësore në Komisariatin e Sarandës, në kuadër të një hetimi të lidhur me dyshime për korrupsion.
Sipas burimeve, Ruçi dyshohet të jetë përfshirë në veprimtari korruptive, ndërsa detajet e plota të operacionit dhe akuzat konkrete pritet të bëhen publike nga AMP.
Arrestimi i tij vjen në një moment kur Agjencia e Mbikëqyrjes Policore ka ndërmarrë një seri goditjesh ndaj strukturave të Policisë në Sarandë. Më herët, AMP goditi pothuajse të gjithë zinxhirin drejtues të policisë së qytetit, në kuadër të hetimeve për shkelje të rënda dhe dyshime për përfshirje në afera korruptive.
Operacionet e fundit konsiderohen ndër ndërhyrjet më të forta të AMP në strukturat policore në jug të vendit, ndërsa hetimet vijojnë për të identifikuar persona të tjerë të përfshirë. /korrieri
