Presidenti amerikan Donald Trump po shqyrton mundësinë e shkarkimit të disa zyrtarëve të lartë të administratës së tij, të cilët kanë kundërshtuar marrëveshjen e fundit me Iranin.
Sipas medias izraelite Israel Hayom, mes emrave që mund të përballen me pasoja politike janë Sekretari i Mbrojtjes, Pete Hegseth, dhe drejtori i CIA-s, John Ratcliffe. Të dy thuhet se kanë shprehur rezerva për marrëveshjen e arritur mes administratës Trump dhe Teheranit.
Një zyrtar i lartë amerikan, i cituar nga media izraelite, ka deklaruar se “debati është mbyllur” dhe se ata që kundërshtuan marrëveshjen “mund të paguajnë një çmim personal”.
Raportimet vijnë në një moment kur brenda administratës amerikane janë shfaqur ndarje të dukshme mbi memorandumin e mirëkuptimit me Iranin. Sipas raportimeve të cituara nga mediat amerikane, drejtori i CIA-s John Ratcliffe, Sekretari i Shtetit Marco Rubio dhe Sekretari i Mbrojtjes Pete Hegseth kanë ngritur shqetësime për gatishmërinë e Iranit për të respektuar detyrimet e marrëveshjes.
Në krahun tjetër, në mbështetje të marrëveshjes janë rreshtuar Zëvendëspresidenti JD Vance, i dërguari special Steve Witkoff dhe Jared Kushner. Ata argumentojnë se rruga diplomatike është alternativa më e mirë për të shmangur përshkallëzimin e mëtejshëm të konfliktit.
Deri tani, Shtëpia e Bardhë nuk ka konfirmuar zyrtarisht se Trump ka marrë vendim për shkarkimin e ndonjë zyrtari të kabinetit. Megjithatë, raportimet nxjerrin në pah tensionet e brendshme që kanë shoqëruar negociatat me Iranin dhe marrëveshjen e shpallur ditët e fundit nga presidenti amerikan.
