Vala ekstreme e të nxehtit që ka përfshirë Evropën ka shkaktuar mbi 1,300 viktima që nga 21 qershori, sipas Organizatës Botërore të Shëndetësisë (OBSH).
Drejtori i Përgjithshëm i OBSH-së, Tedros Adhanom Ghebreyesus, bëri të ditur se rreth 150 milionë njerëz po jetojnë në kushte të vapës ekstreme, ndërsa shkollat janë mbyllur në disa vende dhe rrjetet energjetike po përballen me ngarkesë të madhe.
Sipas përllogaritjeve, rreth 191 milionë banorë pritet të përjetojnë temperatura mbi 35 gradë Celsius, ndërsa në disa zona termometri ka kaluar kufirin e 40 gradëve. Republika Çeke regjistroi një rekord të ri me 41.1°C në Doksany, ndërsa Gjermania shënoi temperaturën më të lartë historike prej 41.7°C në Brandenburg.
Temperaturat ekstreme kanë shkaktuar probleme të shumta në disa vende evropiane. Në Gjermani janë reduktuar shërbimet hekurudhore dhe janë pezulluar linja tramvaji, ndërsa në Berlin autoritetet po përdorin topa uji për të freskuar qytetin. Në Francë, autoritetet raportojnë rreth 1,000 viktima të tjera të lidhura me valën e të nxehtit. Edhe pse temperaturat pritet të ulen gradualisht, Ministrja e Shëndetësisë, Stéphanie Rist, paralajmëroi se pasojat e vapës mund të vazhdojnë deri në 10 ditë. Ndërkohë, stuhitë që goditën vendin lanë rreth 36,000 familje pa energji elektrike.
Meteorologët parashikojnë që vala e të nxehtit të zbutet në pjesën më të madhe të Evropës Perëndimore gjatë kësaj jave, ndërsa temperaturat ekstreme pritet të zhvendosen drejt Evropës Qendrore dhe Ballkanit.
