Sekretari amerikan i Mbrojtjes, Pete Hegseth, deklaroi se lufta me Iranin i ka kushtuar deri tani Shteteve të Bashkuara rreth 37.5 miliardë dollarë, ndërsa ekspertët vlerësojnë se kostoja reale mund të jetë edhe më e lartë.
Gjatë një seance dëgjimore për buxhetin në Senat, senatori demokrat Dick Durbin e pyeti Hegsethin nëse pret që shpenzimet të rriten, tani që armëpushimi mes SHBA-së dhe Iranit konsiderohet praktikisht i përfunduar. Në përgjigje, Hegseth sqaroi se shifra prej 37.5 miliardë dollarësh përfshin edhe shpenzime të planifikuara deri në fund të vitit fiskal, si kostot për ushqimin dhe mbështetjen logjistike të trupave.
Ndërkohë, analiza të pavarura paraqesin një panoramë edhe më të kushtueshme. Në mars, ekspertët vlerësuan se konflikti po u kushtonte taksapaguesve amerikanë mbi 890 milionë dollarë në ditë, ndërsa në maj Pentagoni e llogariti faturën në rreth 29 miliardë dollarë.
Sipas një analize paraprake të Center for Strategic and International Studies (CSIS), kostoja për Departamentin amerikan të Mbrojtjes ka arritur në afro 40 miliardë dollarë, pa përfshirë një pjesë të shpenzimeve operative të mbuluara nga buxheti i përgjithshëm i mbrojtjes për vitin fiskal 2026.
