Detaje të reja janë zbardhur nga vrasja e 20-vjeçarit Johan Zuko, pjesëtar i Forcave të Armatosura, i cili u qëllua për vdekje pasditen e së shtunës, 8 gusht, në lagjen nr. 14 të Korçës.
Për krimin dyshohet Kristjan Sterjo, shok i fëmijërisë së viktimës, i cili vijon të jetë në kërkim.
Sipas të dhënave të deritanishme, Zuko dhe Sterjo njiheshin prej vitesh dhe ishin rritur së bashku. Mes tyre dyshohet se kishte lindur një konflikt, i cili më pas është përshkallëzuar deri në përdorimin e armës.
Hetimet paraprake tregojnë se Sterjo dyshohet se ka ndjekur 20-vjeçarin deri në lagjen ku ndodhi krimi. Në përpjekje për t’i shpëtuar, Zuko, i cili nuk banonte në atë zonë, është futur brenda një pallati dhe ka nisur të ngjisë shkallët.
Por autori i dyshuar e ka ndjekur edhe brenda godinës. Zuko dyshohet se është qëlluar nga pas teksa po ngjiste shkallët, ndërsa ndodhej në katin e tretë të pallatit. Sipas informacioneve paraprake, në vrasje është përdorur një armë e tipit kallashnikov.
Trupi i 20-vjeçarit ka mbetur i shtrirë pranë derës së një apartamenti. Banorët kanë treguar se fillimisht kanë dëgjuar një zhurmë të fortë dhe nuk e kanë kuptuar se çfarë kishte ndodhur.
Një prej banoreve ka rrëfyer se mendoi se dikush ishte rrëzuar nga shkallët dhe doli për ta ndihmuar. Kur është ngjitur në katin e tretë, ka parë të riun të shtrirë përtokë dhe të mbuluar në gjak, ndërsa një tjetër banore kërkonte që të lajmëroheshin menjëherë Policia dhe ambulanca.
Banorët kanë deklaruar se nuk e njihnin viktimën dhe se ai nuk jetonte në atë pallat, çka përforcon dyshimet e hetuesve se Zuko ishte futur në godinë në përpjekje për t’i shpëtuar personit që po e ndiqte.
Pas vrasjes, Kristjan Sterjo dyshohet se është larguar nga vendngjarja. Policia ka nisur një operacion të gjerë për kapjen e tij, ku janë angazhuar edhe forcat speciale RENEA.
Efektivët kanë ushtruar kontrolle edhe pranë banesës së autorit të dyshuar, por Sterjo nuk është gjetur aty. Kontrollet vijojnë në disa zona, ndërsa janë ngritur postblloqe për të parandaluar largimin e tij.
Policia po sekuestron dhe analizon gjithashtu pamjet e kamerave të sigurisë pranë vendit të krimit dhe përgjatë rrugëve ku dyshohet se është larguar Sterjo, me qëllim rindërtimin e itinerarit të tij pas vrasjes.
Sipas të dhënave të deritanishme, autori i dyshuar rezulton me precedentë penalë për armëmbajtje pa leje dhe plagosje.
Grupi hetimor po punon për të zbardhur shkakun e konfliktit mes dy të rinjve dhe dinamikën e plotë të ngjarjes, ndërsa operacioni i Policisë dhe RENEA-s për lokalizimin dhe kapjen e Kristjan Sterjos vijon./korrieri
