Në fund të muajit të kaluar, qeveria shqiptare njoftoi shtetëzimin e shërbimit të dializës pas përfundimit të konçesionit 10 vjeçar.
Përmes një vendimi të posaçëm, Këshilli i Ministrave ngarkoi Operatorin e Shërbimeve të Integruara të Sterilizimit për të ofruar jo vetëm dializën, por edhe kontrollin bazë mjekësor të popullatës, që ndryshe njihet si check up.
“Shërbimi i check-up-it dhe ai i dializës do të merren në dorëzim dhe do të ofrohen nga shteti,” deklaroi ministrja e Shëndetësisë, Evis Sala, menjëherë pas mbledhjes së qeverisë në datën 30 korrik.
Por shtetëzimi i këtyre shërbimeve duket se ka qenë një iluzion. Qeveria ka vendosur riprivatizimin e tyre, këtë herë pas derës së pasme.
Operatori i Shërbimeve të Integruara të Sterilizimit shpalli në regjistrin e parashikimeve të Agjencisë së Prokurimit Publik, një tender me vlerë 4.6 miliardë lekë ose rreth 49 milionë euro për ofrimin e shërbimit të dializës në pesë spitalet publike, Shkodër, Lezhë, Korçë, Vlorë dhe Elbasan për një periudhë 4 vjeçare.
Përmes kësaj proçedure, qeveria privatizon sërish shërbimin e dializës duke zgjedhur një privat, i cili do ta ofrojë këtë shërbim për 4 vitet e ardhshme, kundrejt 49 milionë eurove. Praktikisht ky është një konçesion i fshehtë.
Riprivatizimi i shpejtë i shërbimit të dializës nxjerr në pah një problem jo të vogël, pasojë direkte e konçesioneve në shëndetësi. Këto konçesione kanë shkatërruar kapacitetet publike për ofrimin e shërbimeve jetike mjekësore dhe tani shteti nuk ka zgjidhje tjetër përveçse privatizimit të tyre pafundësisht.
Kostot rriten 35%
Shërbimi i dializës në pesë spitalet publike të rretheve u konçesionua në vitin 2016. Qeveria shqiptare përzgjodhi fituese kompaninë Diavita, e cila mori përsipër ofrimin e shërbimit të dializës për 10 vite kundrejt një çmimi prej 8.5 miliardë lekësh.
Por tashmë kostot do të jenë shumë më të larta. Qeveria po e privatizon sërish shërbimin, këtë herë për katër vjet kundrejt një çmimi prej 4.6 miliardë lekësh. Nëse vendosen në të njëjtën periudhë kohore, me tenderin çmimi i shërbimit që do të paguajnë takspaguesit është rritur me 35 për qind krahasuar me koston e konçesionit të mëparshëm.
Kjo pasi shifra prej 4.6 miliardë lekësh për 4 vjet, nënkupton se për një periudhë 10 vjeçare kostoja shkon 11.5 miliardë lekë nga 8.5 miliardë që ishte konçesioni i dializës.
Llogaritë bëhen edhe më problematike duke patur parasysh faktin se konçesionari i mëparshëm i ngriti vet qendrat e ofrimit të shërbimit, të cilat tani duhet të jenë plotësisht funksionale sipas detyrimit që kishte kontrata konçesionare.
Pra tashmë që privati i ri nuk do të ketë asnjë kosto për ngritjen e qendrave të dializës, pasi ato janë të ngritura, ai do të marrë edhe 35 për qind më shumë fonde nga buxheti i shtetit.
Nuk dihet se si e ka arsyetuar ministria e shëndetësisë, rritjen dramatike të kostove që do të paguajnë qytetarët, a është kjo pasojë e shtimit të numrit të pacientëve që do të përfitojnë shërbimin apo vjen si rezultat i shtrenjtimit të terapisë. Por shtetëzimi i trumbetuar i dializës, rezultoi thjesht një mashtrim. /kapitali.al
