Fenomeni El Nino që po zhvillohet mbi Oqeanin Paqësor mund të jetë ndër më të fuqishmit, madje më i fuqishmi i regjistruar ndonjëherë, paralajmërojnë meteorologët britanikë. Sipas Met Office, temperaturat e sipërfaqes së detit në zonat kyçe të Paqësorit janë tashmë më shumë se 2 gradw celcius mbi normalen dhe mund të kalojnë 3 gradw në muajt në vijim.
Fenomeni natyror rrit temperaturat globale dhe ndikon në modelet e reshjeve dhe stuhive në shumë pjesë të botës. Shkencëtarët paralajmërojnë se, i kombinuar me ngrohjen globale, El Nino mund të bëjë që 2027 të jetë viti më i nxehtë i regjistruar ndonjëherë, duke kaluar rekordin aktual.
Ekspertët thonë se ndikimet e El Ninos tashmë po shfaqen në disa rajone, me reshje nën normalen në pjesë të Azisë dhe ndryshime në aktivitetin e uraganeve në Atlantik. Fenomeni mund të sjellë gjithashtu më shumë thatësira dhe zjarre në Australi, ndërsa vende si Peruja, Ekuadori dhe jugu i SHBA-së mund të përballen me rrezik më të lartë për përmbytje.
Në Evropën veriperëndimore, përfshirë Mbretërinë e Bashkuar, El Nino mund të rrisë mundësinë për një vjeshtë më të lagësht dhe me më shumë stuhi, ndërsa ndikimet në dimër mbeten më të pasigurta.
Sipas shkencëtarëve, temperaturat e jashtëzakonshme të oqeanit dhe sasia e madhe e nxehtësisë së ruajtur në thellësi mund ta fuqizojnë më tej fenomenin në muajt e ardhshëm.
