Banka Qendrore e Holandës (DNB) ka zhvendosur 86 ton ar, me vlerë rreth 10 miliardë euro, nga rezervat e mbajtura kryesisht në Nju Jork dhe pjesërisht në Otavë drejt Londrës.
DNB e ka justifikuar vendimin me rritjen e paqëndrueshmërisë politike dhe nevojën për të qenë e përgatitur për kriza të mundshme gjeopolitike.
Rreth 59 ton ar u transferuan përmes shitjes së shufrave në tregun e Amerikës së Veriut dhe blerjes së një sasie të barabartë në tregun londinez, ndërsa 27 ton të tjera u transportuan fizikisht në Holandë dhe më pas në Londër. Sipas Bankës Qendrore, ari në Londër është më i lehtë për t’u likuiduar në rast nevoje urgjente për fonde.
Në fund të vitit 2025, Holanda kishte rreth 614 ton ar në rezervë, me vlerë afërsisht 72 miliardë euro. Pas transferimit, rreth një e treta e rezervave ndodhet në Holandë, një e treta në Londër, ndërsa pjesa e mbajtur në Nju Jork ka rënë nga 31.3% në 18.5%.
DNB thekson se shpërndarja më e balancuar e rezervave mes Holandës, Londrës dhe Amerikës së Veriut synon të diversifikojë rreziqet dhe të sigurojë akses më të shpejtë në ar në rast të një krize.
