Janë lënë të lirë rreth 10 personat e shoqëruar dhe marrë në pyetje në kuadër të hetimeve për vrasjen e 65-vjeçarit Viktor Bardhi në Mirditë.
Pas marrjes së dëshmive dhe verifikimeve të kryera, hetuesit nuk kanë gjetur elemente që mund t’i lidhin personat e shoqëruar me atentatin e rëndë të ndodhur në fshatin Ndërfushas.
Ndërkohë, hetimet për identifikimin e autorëve vijojnë. Grupi hetimor po analizon pamjet e kamerave të sigurisë në zonë, si dhe përgjatë akseve që të çojnë drejt vendit ku u gjet automjeti i djegur pas atentatit.
Dyshohet se autorët e kanë monitoruar paraprakisht zonën dhe kanë planifikuar lëvizjet për të shmangur kamerat e sigurisë. Deri më tani, në zonat e mbuluara nga kamera nuk janë evidentuar lëvizje që mund të ndihmojnë në identifikimin e tyre.
Hetuesit po këqyrin gjithashtu terrenin për gjurmë apo prova të mundshme, pasi ekziston dyshimi se ekzekutorët mund të jenë afruar në këmbë në vendin ku kryen vrasjen.
Pista kryesore e hetimit mbetet ajo e hakmarrjes, e lidhur me konfliktin mes fiseve Reçi dhe Bardhi, i cili daton prej vitit 2016 dhe dyshohet se ka shkaktuar të paktën nëntë viktima. Megjithatë, po hetohen edhe pista të tjera jashtë këtij konflikti.
Viktor Bardhi u ekzekutua paraditen e së enjtes, rreth një kilometër larg banesës së tij. 65-vjeçari ishte nisur drejt ujësjellësit për të hapur linjën e furnizimit me ujë të fshatit, kur pranë një nënkalimi u qëllua me breshëri automatiku.
Në drejtim të tij u qëllua me të paktën 30 plumba. Kanë qenë banorët e zonës që konstatuan automjetin dhe njoftuan Policinë. /vna
