Thellohet edhe më tej skandali i përplasjes mes biznesmenëve Luan Muça, i kompanisë Delta, dhe Vasil Bedinaj, i rrjetit të hoteleve Rexhina. Dy prej protagonistëve në ngjarje rezultojnë se janë pjesëtarë të Forcave të Armatosura. Ministri i Mbrojtjes, Ermal Nufi, pranon se efektivët janë pjesë e Policisë Ushtarake që prej vitit 2006.
Por, ndërsa përpiqet të shpjegojë se nuk janë truprojat e tij personale, ministri Nufi nuk jep asnjë shpjegim se si ushtarakët janë shndërruar në një strukturë paramilitare që vepron për llogari të biznesmenëve të ndryshëm.
“Ata janë pjesë e Policisë Ushtarake, strukturë e Forcave të Armatosura me detyra dhe përgjegjësi të përcaktuara me ligj.
Efektivët e dyshuar janë pjesë e Policisë Ushtarake që nga viti 2006 dhe, në periudha të ndryshme prej vitit 2018, ata kanë kryer edhe detyra të sigurisë, mbrojtjes dhe shoqërimit institucional të Ministrit të Mbrojtjes, por kjo nuk i bën ata punonjës personalë të ministrit dhe, aq më pak, nuk i lidh veprimet e tyre individuale me institucionin apo me ministrin”, thekson Nufi.
Në vazhdën e reagimit, Nufi kujdeset të theksojë “se asnjëri prej dy efektivëve nuk ka qenë në shërbim ditën e ngjarjes në Vlorë. Për rrjedhojë, çdo veprim i tyre në këtë ngjarje, nëse konfirmohet nga organet kompetente, është veprim individual dhe jashtë detyrës institucionale”. Ministri sqaron po ashtu se janë marrë masa për pezullimin e tyre.
“Ministria e Mbrojtjes distancohet qartësisht nga çdo veprim i paligjshëm dhe respekton plotësisht hetimin e organeve ligjzbatuese.
Përgjegjësia individuale dhe rrethanat e ngjarjes do të përcaktohen vetëm nga autoritetet kompetente, në përputhje me ligjin.
Deri në përfundimin e verifikimeve, dy efektivët janë pezulluar nga shërbimi në Policinë Ushtarake”, thekson në deklaratë MM.
