Pse përherë Samir Mane? Nga vila e Ballukut te paratë e kokainës, “Green Coast” del sërish në dosjet e SPAK
Nga Korrieri
Biznesmeni më i madh i vendit nuk është akuzuar nga SPAK, por emri i tij dhe kompanitë që zotëron shfaqen vazhdimisht në periferi të dosjeve më të bujshme. Rastësi e diktuar nga përmasat e biznesit apo një afërsi që kërkon transparencë?
Biznesmeni Samir Mane qëndroi për rreth dy orë në Prokurorinë e Posaçme, ku u paraqit pas drejtuesve të studios “Atelier 4”, Alban dhe Olsi Eftimi.
Sipas raportimeve, Mane u pyet në kuadër të hetimeve për vilën nr. 188/1 në kompleksin “Green Coast” në Palasë, të sekuestruar nga SPAK dhe për të cilën dyshohet se zotërohej faktikisht nga ish-zëvendëskryeministrja Belinda Balluku.
Paraqitja e tij ngre një pyetje që nuk mund të shmanget më: Pse emri i Samir Manes dhe bizneset e tij shfaqen vazhdimisht në dosjet më të bujshme të SPAK?
Në rastin e vilës së Ballukut, “Green Coast” nuk është thjesht vendi ku ndodhet prona. Në kompjuterët e studios “Atelier 4” janë gjetur preventivë, planimetri dhe komunikime për projektimin e saj, nga pishina “infinity” dhe vaskat hidromasazhi deri te druri “teak” dhe mermeri.
Sipas SPAK, karabinaja dyshohet se është financuar nga ish-futbollisti Igli Tare, ndërsa punimet e tjera dhe pishina nga biznesmeni Arbër Abazi. Në dokumentet e sekuestruara rezultojnë pagesa të kompanisë së Abazit që variojnë nga 288 mijë deri në 410 mijë euro.
Në qendër të hetimit është mënyra se si vila u porosit, u projektua, u financua, u ndërtua dhe përfundoi brenda kompleksit të zhvilluar nga grupi BALFIN. Pikërisht këtu hyn në dosje edhe emri i Samir Manes.
Por kjo nuk është hera e parë.
Pak muaj më parë, emri i Manes dhe projekti “Green Coast” dolën edhe në dosjen “Aruba”, një prej hetimeve më të mëdha të SPAK për trafik ndërkombëtar kokaine dhe pastrim parash.
Komunikimet në SKY ECC tregojnë se Artur Koçeku dhe Alfredo Hamzai, të akuzuar për trafikimin e sasive të mëdha të kokainës drejt Europës, diskutonin për përfshirjen e tokave të tyre në zgjerimin e “Green Coast”.
Sipas analizës së SPAK, ata i kishin kërkuar biznesmenit Ilir Shtufi të ndërmjetësonte te Samir Mane. Në biseda flitej për një pagesë prej 3 milionë eurosh, ndërtimin e 40 vilave, kalimin e 20% të tyre te Hamzai dhe ndërtimin e një hoteli me 120 dhoma për Koçekun dhe Hamzain.
Nuk ka prova publike se kjo pagesë është kryer apo se marrëveshja është realizuar. BALFIN i ka mohuar kategorikisht transaksionet financiare ose bashkë-investimet me Koçekun dhe Hamzain, ndërsa ndaj Manes nuk është njoftuar ndonjë akuzë penale.
Megjithatë, në kuadër të atij hetimi BKH ushtroi kontrolle në vilën dhe zyrat e tij dhe sekuestroi telefonin celular. Tashmë, vetëm disa muaj më vonë, Mane shfaqet në SPAK për një tjetër dosje të bujshme, sërish me pikë takimi kompleksin “Green Coast”.
Natyrisht, pronari i një projekti kaq të madh mund të përmendet sa herë hetohet një vilë, një kontratë apo një transaksion brenda tij. Vetëm përmendja e emrit nuk provon përgjegjësi penale.
Por përmasat e biznesit nuk mund të përdoren as si përgjigje përfundimtare.
Përkundrazi, sa më i fuqishëm të jetë një grup dhe sa më shumë privilegje, leje e statuse strategjike të ketë përfituar, aq më të mëdha janë detyrimet e tij për të kontrolluar klientët, pronarët e tokave, burimin e financimeve dhe përfituesit realë të pasurive.
Si përfundoi një vilë që dyshohet se i përkiste Ballukut brenda “Green Coast”? Kush e porositi zyrtarisht dhe kush e pagoi? Çfarë dinin administratorët e kompleksit për përdoruesin real të saj? A u diskutua vërtet marrëveshja prej 3 milionë eurosh me grupin e Koçekut? Çfarë kontrollesh janë kryer mbi pronat dhe personat që kërkonin të hynin në projekt?
