Biznesmeni Kastriot Hasko është arrestuar me urdhër të Prokurorisë së Fierit, nën dyshimet për falsifikimin e dokumenteve të pronësisë për një sipërfaqe të madhe toke në zonën e Semanit.
Bashkë me të është vënë në pranga edhe Ertis Shehu, ish-drejtor i Kadastrës së Fierit.
Hasko u bë i njohur publikisht pas përplasjes me armë mes biznesmenëve Luan Muça dhe Vasil Bedinaj për një pronë në Palasë.
Pas ngjarjes, ai u shfaq në media duke deklaruar se ishte pronari i parcelës për të cilën kishte lindur konflikti.
Hasko pretendonte se tokën e kishte trashëguar nga gjyshi dhe se kishte lidhur një kontratë zhvillimi me biznesmenin Vasil Bedinaj.
Megjithatë, arrestimi i tij nuk lidhet me pronën në Palasë, por me dyshimet për falsifikimin e dokumenteve të një sipërfaqeje tjetër toke në Seman të Fierit.
Hasko dhe Shehu mësohet se kishin qenë prej disa muajsh nën hetim nga Prokuroria e Fierit.
Urdhrat e arrestit ndaj tyre u ekzekutuan mbrëmjen e së mërkurës në Tiranë.
Sipas burimeve, rasti i dyshuar i falsifikimit të dokumenteve të pronësisë u zbulua në fund të vitit 2024 gjatë një kontrolli administrativ.
Kontrolli ishte kryer vetëm dy muaj pasi drejtoresha e Përgjithshme e Kadastrës, Lorena Goxhobelli, kishte marrë detyrën.
Hetimet pritet të përcaktojnë rolin e secilit prej të arrestuarve dhe mënyrën se si dyshohet se janë falsifikuar dokumentet e pronësisë./korrieri
