Tirana u zgjua sot pas një prej netëve më të dhunshme të protestave të viteve të fundit.
Ajo që nisi dje pasdite si protestë studentore përpara Ministrisë së Arsimit, përfundoi me përplasje të ashpra me policinë, xhama të thyer, gaz lotsjellës, ndërhyrje të forcave të rendit dhe qytetarë të lënduar. Protestuesit u përplasën me efektivët përpara ministrisë, ndërsa më pas tensionet u zhvendosën drejt Bashkisë së Tiranës.
Pamjet e dhunës policore, veçanërisht ato të një 19-vjeçari që transportohej në krahë nga efektivët me këmbën e thyer, shkaktuan reagime të forta.
Ledion Balla nga Librazhdi, i cili nuk ishte protestues, por kalimtar, u ka deklaruar mjekëve se këmbën ia thyen policët.
Ndërkohë, Ambasada Amerikane paralajmëroi qytetarët e saj të shmangnin zonën për shkak të përshkallëzimit të dhunës.
Bilanci mjekësor i natës konfirmon se 19-vjeçari ishte rasti më i rëndë i paraqitur në Spitalin e Traumës.
Shefi i Urgjencës, Agustin Suma, deklaroi se i riu kishte pësuar frakturë të kërcirit të djathtë dhe ishte shtruar në pavionin e ortopedisë, në gjendje të stabilizuar.
Sipas tij, qytetarët e tjerë kishin kryesisht dëmtime të lehta, ndërsa shtatë efektivë policie morën ndihmë mjekësore dhe u larguan nga spitali. Nuk pati viktima apo pacientë të intubuar.
Por mëngjesi i sotëm e gjen policinë përballë një dëshmie që kërkon hetim: një 19-vjeçar që thotë se u dhunua pa qenë pjesë e protestës dhe që tani ndodhet në spital me këmbën në allçi.
