Prokuroria e Posaçme ka kërkuar dënimin me 2 vite burg për kryebashkiakun e Shkodrës, Benet Beci, i akuzuar për shkelje të barazisë së pjesëmarrësve në tendera gjatë kohës kur drejtonte Korporatën Elektroenergjetike Shqiptare.
Çështja lidhet me një procedurë prokurimi të zhvilluar në vitin 2019, me objekt “Zhvillimi Strategjik i Sektorit Energjetik”, me fond limit rreth 69.5 milionë lekë pa TVSH.
Sipas SPAK, gjatë zhvillimit të procedurës janë kryer veprime që dyshohet se kanë favorizuar kompaninë “Consulting & Management Albania”, e cila rezultoi fituese e tenderit.
Hetimet kanë përfshirë edhe persona të tjerë, mes tyre ish-zyrtarë të KESH-it dhe persona të lidhur me kompaninë fituese.
Beci po gjykohet për veprën penale të shkeljes së barazisë së pjesëmarrësve në tendera apo ankande publike, të kryer në bashkëpunim.
Gjykata e Posaçme ka pranuar kërkesën për gjykim të shkurtuar, ndërsa vendimi përfundimtar për kryebashkiakun e Shkodrës ende nuk është dhënë.
