Një 42-vjeçare është arrestuar nga policia në Krujë, pasi dyshohet se ka vrarë foshnjen të cilën e solli në jetë mëngjesin e sotëm.
Ngjarja e rëndë ka ndodhur në fshatin Tapizë të Krujës, ku sipas policisë, 42-vjeçarja L. Koçi pasi lindi foshnjen në banesën e saj, duke pretenduar se kishte lindur e vdekur, e futi në një qese dhe e hodhi në lumin e fshatit.
Njoftimi i Policisë:
Specialistët për Hetimin e Krimeve të Komisariatit të Policisë Krujë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ndaluan shtetasen L. K., 42 vjeçe, banuese në Tapizë, për veprën penale “Vrasja e foshnjes”.
Kjo shtetase, ditën e sotme, rreth orëve të mëngjesit, dyshohet se pasi ka lindur foshnjen në ambientet e banesës së saj, duke pretenduar se ka lindur e vdekur, e ka futur në një qese dhe më pas e ka hedhur në bregun e lumit të Tapizës.
Materialet procedurale i kaluan Prokurorisë, për veprime të mëtejshme.
