Një ngjarje e rëndë dhe e paprecedent është regjistruar pasditen e djeshme në Drejtorinë Vendore të Policisë së Shkodrës.
Burime për mediat bëjnë me dije se dy vëllezërit Marjan dhe Mateo Doçi kanë dhunuar me grushte efektivët e forcave “Shqiponja” brenda ambienteve të Policisë së Shkodrës.
Mësohet se rreth orës 14:00 të ditës së djeshme efektivët e “Shqiponjave” kanë ndaluar një automjet në pronësi të Marjan Doçit për të ushtruar kontroll, por ka hasur kundërshtinë e drejtuesit të mjetit, gjë e cila ka sjellë shoqërimin e tij në komisariat.
Pas këtij shoqërimi në mjediset e Policisë kanë mbërritur vëllezërit Marjan dhe Mateo Doçi duke qenë se makina e ndaluar është e tyre. Ata janë njoftuar nga dy personat që ndodheshin në automjet për ndalimin nga ana e policisë.
Fillimisht ka qenë Marjan Doçi, me precedent penal, ai i cili ka mbërritur i pari ku është futur në oborrin e Policisë së Shkodrës dhe aty ka goditur me grusht një efektiv Policie. Pak momente më vonë, vëllezërit Doçi hynë dhe në ambientet e brendshme të komisariatit duke dhunuar edhe një efektiv tjetër.
Ata kanë kërkuar që automjeti të nxirret me forcë nga mjediset e komisariatit dhe aty janë konfliktuar me efektivët e Policisë, duke i dhunuar këta të fundit. Pas kësaj ngjarje ata janë arrestua në akuzën për veprën penale “goditje për shkak të detyrës” dhe “kundërshtim i forcave të Policisë”. Gjithashtu është proceduar edhe i riu që drejtonte mjetin shtetasi E. L., 19 vjeç.
“Gjatë patrullimit të zakonshëm në sheshin “Prek Cali”, punonjësit e Policisë të Forcës së Posaçme “Shqiponja” kanë konstatuar një automjet dhe i kanë bërë me shenjë që të ndalonte, për të ushtruar kontroll për sende të kundërligjshme. Automjeti drejtohej nga shtetasi E. L., 19 vjeç. Gjatë kontrollit fizik ndaj 19-vjeçarit, ky shtetas ka tentuar të largohet me vrap, por është kapur dhe ndaluar nga shërbimet e Forcës së Posaçme “Shqiponja”. Në momentin e shoqërimit të automjetit, shërbimet e Policisë janë kundërshtuar me forcë nga shtetasit M. D., 29 vjeç dhe M. M. alias M. D., 38 vjeç (vellezër), të cilët kanë kryer veprime të dhunshme gjatë shoqërimit të automjetit dhe në ambientet e brendshme të Drejtorisë Vendore”,njofton Policia.
