“Sterizlimi është një nga kontratat dhe një nga punët më të bukura që ne kemi bërë”.
Kështu e mbrojti kryeministri Edi Rama aferën korruptive të koncesionit për sterilizimin e mjeteve spitalore, që i ka kushtuar taksapaguuesve shqiptarë 100 milionë euro.
Edhe pse pas hekurave për koncesionin e dyshimtë ndodhen aktualisht Klodian Rjepaj -ish-zv/ministri i Shëndetësisë në qeverinë e tij – dhe biznesmeni i kompanisë “SaniService” që përfitojë këtë PPP, Ilir Rrapaj, shefi i qeverisë e mbrojti hapur “Sterilizimin”.
Sipas Ramës për të kuptuar efektet pozitive të kësaj kontrate duhen pyetur mjekët, specialistët dhe qytetarët, të cilët i ndjejnë çdo ditë nëpër spitale.
“100 herë të kthehesha mbrapa, 100 herë do të mbështesja këto PPP që kemi bërë. 100 herë. Sepse veprat janë ato që mbeten, ndërkohë që sigurisht problemet e korrupsionit janë të lidhura me ata që kanë gjëra në dorë, nuk janë të lidhura me ata që s’kanë gjë në dorë. Kur ne kemi bërë reformën në drejtësi dhe kur kam thënë që dua një drejtësi që të godasë majtas, djathtas dhe të ecë vetëm drejt nuk kam bërë propagandë, e kam ditur këtë qe vjen. Nuk e kam ditur kujt do t’i ndodhë, por e kam ditur këtë që vjen. Shumë socialistë të korruptuar? Socialistët janë 1 mln kurse të korruptuarit janë shumë pak, janë asgjë në raport me fuqinë e PS. Për këtë mos më pyesni mua, por njerëzit në spitale. Kam marrë pafund mesazhe nga mjekë, profesionistë që ishin të shqetësuar se mos kontraata do të sekuestrohej, që nuk ishte rasti. Sepse me atë kontratë dhe atë transformim ne kemi ndryshuar shëndetësinë shqiptare në hallkën e vetë më delikate, që janë ndërhyrjet në trupin e njerëzve”, tha Rama.
Por, në vijim të sqarimit të tij mbi Sterilizimin, kryeministri si në çdo aferë tjetër që ëështë firmosur prej ministrave të tij, ka zgjedhur t’i shesë të vetët tek drejtësia.
“Nëse në procesin e asaj kontrate individë të caktuar kanë hyrë në gjynah me popullin dhe me atdheun të cilit i shëbrejmë, do paguajnë. Kështu funksionon. Do paguajnë”, iu përgjigj Rama pyetjes së gazetarëve që i kujtuan përfshirjen e ish-ministrit të Shëndetësisë Ilir Beqja në këtë aferë.
Në përpjekje për të dalë vetë i larë nga akuzat për aferat në Shëndetësi që nga 2013, kohë kur ai mori pushtetin, Rama deklaroi se kur PS zgjedh njerëzit, ata “nuk i kalojmë në sallën e torturave për të marrë vesh se çfarë do të bëjnë në të ardhmen”.
Sipas kryeministrit edhe në këtë rast përgjegjësia do të jetë personale për ata, që sipas tij nuk i kanë rezistuar tundimit për përfitime nga pushteti.
“Pushteti është një lloj kafshe shumë e egër, është shumë e vështirë ta mbash të zbutur dhe të mos biesh pre e dhëmbëve të veta. Ka shumë që i rezistojnë tundimeve, ka disa që nuk i rezistojnë tundimeve. Por nuk mund të bëjmë parashikime paraprake se kush do t’i rezistojë apo jo tundimeve. Pastaj në proces njerëzit janë fytyra e karaktere të ndryshme. Ka disa që pyesin, disa që nuk pyesin për ato që pushteti të tundon. Këtu s’ka asgjë tjetër përveç përgjegjësisë individuale për gjithësecilin që nuk e mban dot peshën e tundimeve për të bërë një rrugë e dy punë dhe rezultateve të punës. Ndaj ju them për Sterilizimin shkoni pyesni ata që i përdorin instrumentat mjekësorë se çfarë thonë”, nënvizoi Rama.
