KORRUPSIONI/ “Skënder Nipolli dhe një polic tjetër më morën 500 mijë lekë”, banori në Belsh denoncon në STOP policinë, efektivët pezullohen nga detyra
Një banor i fshatit Seferan në Belsh ka denoncuar publikisht punonjës të Policisë Bashkiake dhe të Policisë së Shtetit, duke i akuzuar se i kanë marrë ryshfet për ta lejuar të vijonte një ndërtim pa leje. Denoncimi është bërë nga Ylli Gjoshi, i cili ka deklaruar se ka paguar shuma parash për të mos u ndaluar punimet.
Sipas deklarimeve të tij, fillimisht janë paraqitur punonjës të Policisë Bashkiake të Belshit, të cilët i kanë ndaluar punimet duke i thënë se nuk kishte leje ndërtimi. Gjoshi pretendon se i është kërkuar pagesë në këmbim të “zgjidhjes” së situatës dhe se ka dorëzuar 500 euro një punonjësi të Policisë Bashkiake, i cili më pas e ka lejuar të vijonte punimet deri pranë përfundimit të ndërtimit.
Ai deklaron se ndërtimi ka vijuar pa pengesa pas kësaj pagese, ndërsa problemi është rishfaqur në momentin kur nisi rrethimin e objektit me mur. Në këtë fazë, sipas tij, janë paraqitur punonjës të Policisë së Shtetit nga Komisariati i Belshit, të cilët i kanë kërkuar para për të mos ndërhyrë.
Gjoshi pretendon se dy punonjës policie i janë paraqitur disa herë, fillimisht duke i kërkuar shuma më të vogla, ndërsa më pas i kanë kërkuar një pagesë prej 500 mijë lekësh. Ai thotë se paratë ua ka dorëzuar brenda automjetit të policisë dhe se këto veprime janë të dokumentuara nga kamerat e sigurisë që kishte instaluar në banesë.
Sipas deklarimeve të tij, pagesa është bërë një ditë para se policët të largoheshin, ndërsa ai mban përgjegjësi të plotë për atë që ka deklaruar, duke përfshirë edhe familjen e tij. Banori thotë se filmimet nga kamerat e sigurisë tregojnë qartë lëvizjet e punonjësve të policisë pranë banesës së tij.
Pas publikimit të këtyre pretendimeve, Drejtoria Vendore e Policisë Elbasan ka reaguar duke marrë masa administrative. Me vendim të drejtorit të policisë, dy punonjës të Policisë së Shtetit janë pezulluar nga detyra, në zbatim të nenit 222 të Rregullores së Policisë së Shtetit, deri në sqarimin e plotë të rrethanave të rastit.
Bëhet fjalë për inspektor Skënder Nipolli, me detyrë ndihmësspecialist i Policimit në Komunitet në Stacionin e Policisë Belsh, si dhe inspektor Genc Çalja, me detyrë ndihmësspecialist, agjent krimesh, në Komisariatin e Policisë Cërrik. Sipas njoftimit zyrtar, pezullimi ka ardhur pas pretendimeve se punonjësit e policisë kanë marrë ryshfet për të lejuar një ndërtim pa leje në fshatin Seferan. /TVKLAN
