Ngjarja e rëndë në Dhërmi, ku Gerald Shehu dyshohet se ka vrarë dhe ka zhdukur recepsionistin e hotelit “Greccia”, ka ekspozuar pronarët e strukturës akomoduese ndaj një verifikimi pasuror, të nisur nga oficerët e Policisë Gjyqësore që po zhvillojnë paralelisht hetimet për vrasjen e supozuar të Eraldo Novruzit.
Në orët e hershme të së Enjtes dyshohet se Shehu ka qëlluar me armë zjarri ndaj punonjësit të hotelit, 31-vjeçarit Novruzi, në një nga dhomat e godinës. Policia, e njoftuar nga pronarët e hotelit për “humbjen e kontakteve” me recepsionistin, ka kryer hetime dhe ka arritur në konkluzion se ai është vrarë.
Trupi i pajetë i Eraldo Novruzit u gjet vetëm paraditen e së Premtes, pranë një guroreje, në zonën e Vunoit.
Autori i dyshuar, Gerald Shehu, u arrestua në një aeroport të Selanikut, duke u bërë gati për të udhëtuar drejt Britanisë së Madhe, ku është rezident prej disa vitesh.
Nga verifikimet e kryera nga Policia Gjyqësore, autori i dyshuar Shehu rezulton të jetë një prej pronarëve të strukturës hoteliere. Pas marrjes së informacioneve paraprake, hetuesit kanë parë të arsyeshme që të kryhet edhe një hetim pasuror, ndërkohë që po zhvillohen veprimet për vrasjen.
Dyshimet e hetuesve
Hotel “Greccia”, ku është zhvilluar ngjarja e rëndë e dyshuar, ndodhet në një zonë të preferuar, në rrugën që zbret nga fshati Dhërmi drejt bregut.
Hoteli, sipas dokumentave në Qendrën Kombëtare të Biznesit (QKB), është në pronësi të shtetases Gentjana Nino. Megjithëse një strukturë hoteliere me 5 kate, biznesi rezulton i regjistruar si “Person Fizik”.
Gjithnjë referuar dokumentave zyrtare, biznesi është hapur fillimisht në vitin 2017, nën emrin “Gentjana Nino”, me objekt “dhënie dhomash me qira”. Fillimisht, biznesi ka pasur 5 dhoma.
Ndërkohë, në ndryshimet e mëvonshme, biznesi është njohur me emrin tregtar “Hotel Greccia” dhe, sipas të dhënave të vetëdeklaruara, aktualisht ka në dispozicion 15 dhoma.
Ndërkohë, autori i dyshuar i vrajes, Gerald Shehu, dhëndri i pronares së hotelit, rezulton që të jetë i regjistruar në Qendrën Kombëtare të Biznesit (QKB) si “person fizik”, me objekt të aktivitetit “bar-restorant, plazh privat”, me emrin tregtar “Greccia Hotel”.
Nga të dhënat e deritanishme të siguruara nga Policia Gjyqësore, rezulton se Gerald Shehu zotëron plazhin privat dhe bar-restorantin “Greccia”, të cilat janë në funksion të Hotel “Greccia”, i cili është në pronësi të vjehrrës së tij.
Objekt i këtij verifikimi paralel me hetimin për vrasjen ka për objekt shqyrtimin e burimeve të ligjshmërisë së të ardhurave të Gerald Shehu, i cili prej vitesh është rezident në Britaninë e Madhe.
Këto verifikime pasurore janë në fazën fillestare, pasi për momentin të gjithë energjitë e hetuesve janë fokusuar tek gjetja e trupit të viktimës së supozuar, tek motivet dhe personat e përfshirë në këtë ngjarje.
Paraditen e së premtes, Policia njoftoi se janë arrestuar edhe dy punonjës të tjerë të hotel “Greccia”, Daniel Qose e David Larti, të dyshuar se kanë ndihmuar autorin e ngjarjes së pretenduar, Gerald Shehu, për t’u larguar nga Dhërmiu e, më tej, edhe nga Shqipëria në drejtim të Greqisë. /boldnews
