Agjencia e lajmeve Reuters i ka kushtuar vëmendje ndërprerjes së madhe të energjisë që këtë të premte goditi Malin e Zi, Bosnjën, Shqipërinë dhe pjesën më të madhe të bregdetit të Kroacisë. Ndërprerja e energjisë goditi bizneset, mbylli semaforët duke i lënë njerëzit të mbyten pa ajër të kondicionuar në mes të një vale të nxehti.
Ministri i Energjisë i Malit të Zi tha se bllokada u shkaktua nga një rritje e papritur e konsumit të energjisë, e shkaktuar nga temperaturat e larta dhe nga vetë nxehtësia. Sistemet e shpërndarjes së energjisë elektrike janë të lidhura me njëra tjetrën në të gjithë Ballkanin për transferime dhe tregti mes tyre.
“Kjo thjesht priste këtë vapë që të ndodhte” – i tha Reuters, Gentiana, një studente 24-vjeçare në kryeqytetin e Malit të Zi, Podgoricë. Rrjetet e energjisë elektrike dhe wifi-të u fikën rreth orës 13:00, – thanë zyrtarët dhe përdoruesit e mediave sociale. Operatorët thanë se kishin filluar rivendosjen e furnizimit nga mesi i pasdites.
Trafiku u ndal në kryeqytetin e Bosnjës, Sarajevë dhe qytetet Banja Luka dhe Mostar, thanë reporterët e Reuters, pasi temperaturat arritën 40 gradë Celsius në këtë pjesë të rajonit. Shumë humbën ujin në Podgoricë pasi pompat pushuan së funksionuari. Kondicionerët mbyllen dhe akullorja u shkri në dyqanet turistike. Pati gjithashtu bllokime trafiku në qytetin bregdetar kroat të Splitit. Sirenat e ambulancës ranë nëpër qytet.
“Dështimi ndodhi si rezultat i një ngarkese të madhe në rrjet, një rritje e papritur e konsumit të energjisë për shkak të temperaturës së lartë dhe vetë temperaturave të larta,” tha në një transmetim televiziv ministri i Energjisë së Malit të Zi, Sasha Mujovic. Ekspertët po përpiqen ende të identifikonin se nga e kishte origjinën mosfunksionimi, shtoi ai.
Vijesti TV i Malit të Zi tha se një zjarr ishte vërejtur në një linjë transmetimi 400 KW në një zonë të thyer përgjatë kufirit me Bosnjën megjithëse nuk ishte menjëherë e qartë nëse ky mund të kishte qenë shkaku i ndërprerjeve apo në një farë mënyre i lidhur me to. VIjesti citoi burime të paidentifikuara nga kompania e transmetimit elektrik CGES, e cila, tha se kishte nevojë për helikopterë për të hyrë në vend.
Ministrja shqiptare e Energjisë, Belinda Balluku tha se kishte pasur një avari në një ndërlidhës ndërmjet Shqipërisë dhe Greqisë dhe ai kishte dëgjuar se kishte pasur rrethana të ngjashme në Mal të Zi dhe pjesë të Kroacisë dhe Bosnjës.
Një hetim i plotë do të kërkonte kohë, por analizat e hershme sugjeruan se “vëllimet e mëdha të energjisë në sistemin e transmetimit për momentin dhe temperaturat shumë të larta në nivele rekord kanë krijuar këtë problem teknik”, shtoi Balluku në një video.
Energjia në Shqipëri u rivendos brenda gjysmë ore, por vendi mbeti në një rrezik të lartë për bllokime të mëtejshme pasi përdorimi i energjisë dhe niveli i vapës është ende i lartë.
Agjencia shtetërore e lajmeve e Kroacisë, HINA, citoi burime të paidentifikuara duke thënë se defekti kishte filluar në Malin e Zi. Vendet e Ballkanit Perëndimor kanë bërë një bum në investimet në energjinë diellore, gjë që mund të ndihmojë në lehtësimin e krizave të energjisë nga qymyri. Por infrastruktura nuk është e përgatitur për furnizime të reja të energjisë, tha presidenti i Komisionit Rregullator të Energjisë të Maqedonisë së Veriut.
