Ish-kryebashkiaku i Durrësit, Vangjush Dako për gati 2 orë, ka dhënë dëshminë e tij në ambientet e Strukturës së Posaçme kundër Korrupsionit dhe Krimit të Organizuar. Sipas të dhënave që janë mësuar deri më tani, mësohet se Dako do të merret në pyetje lidhur me dosjen e ish-deputetit socialist, Jugis Çyrbja, i cili është vendosur në pranga thuajse një muaj më parë. Por në momentin që ka dalë nga SPAK, para mediave, Dako ka zgjedhur që të mos japë detaje lidhur me të dhënat që ka bërë me dije pranë Prokurorisë së Posaçme.
“Nuk jap sqarime!,”-është shprehur Dako para gazetarëve.
Vetëm pak ditë më parë, Vangjush Dako u dënua nga Gjykata e Posaçme kundër Korrupsionit dhe Krimit të Organizuar me 2 vite e 8 muaj burg pasi u gjet i fajshëm për “shpërdorim detyre’ në dy raste. Nga ana tjetër, ish-deputeti socialist Jurgis Çyrbja u vu në pranga më 20 Tetor 2024, pasi akuzohet për: “Korrupsion aktiv zgjedhor”, “Përkrahje e autorit të krimit” dhe “Tregtimi i sekretit shtetëror”. Nga përgjimet në dosje, Çyrbja bisedon me persona të njohur për botën e krimit, Altin Hajri dhe Edmond Koçi, ky i fundit i ekzekutuar. /korrieri
