Shërbimi i keq, bie numri i abonentëve , ONE Albania në pikiatë
Rënia e popullsisë si pasojë e emigrimit masiv është shndërruar në një problem serioz edhe për kompanitë celulare, të cilat po humbasin me shpejtësi klientët.
Të dhënat e fundit zyrtare nga Autoriteti i Komunikimeve Elektronike tregojnë se numri i përdoruesve aktivë të shërbimeve celulare u rrudh me me gati 8 për qind në tremujorin e dytë të vitit, krahasuar me të njëjtën periudhë të vitit të kaluar, sipas Kapitali.
Sipas AKEP, numri i përdoruesve aktivë të shërbimeve celulare zbriti 2.57 milionë vetë në fund të tremujorit të dytë, nga 2.79 milionë që ishte në të njëjtën periudhë të vitit të kaluar.
Rënia ka qenë veçanërisht e fortë për kompaninë ONE, e cila ka humbur 180 mijë abonentë ose 12.6 për qind të përdoruesve aktive vetëm në harkun kohor të një viti. Sipas AKEP, numri i përdoruesve aktivë të rrjetit ONE ra nga 1.42 milionë që ishte në tremujorin e dytë vjet, në 1.24 milionë në tremujorin e dytë të këtij viti.
Sa i përket ONE Albania, rënia ka ardhur për shkak të emigrimit, por edhe përkeqësimit të ndjeshëm të shërbimit nga kompania pas ndryshimit të pronësisë. Gjatë verës pati mjaft probleme, gjë që ndikoi në braktisjen masive të ONE Albania, ndërsa Vodafone e shfrytëzoi këtë probleme duke rritur edhe më tepër çmimet.
Kompania ONE nuk e kishte një shpjegim të qartë për rënien dyshifrore të abonentëve. Sipas saj, një pjesë e rënies lidhet me pastrimet e numrave, edhe pse të dhënat i referohen përdoruesve aktivë.
Në rastin e ONE, rënia e fortë duket se nuk lidhet vetëm me emigrimin, por edhe me një trend braktisje të kompanisë nga abonentët e saj.
Shifrat tregojnë se një pjesë e abonentëve të Albtelecom nuk kanë preferuar të qëndrojnë në rrjetin ONE, veçanërisht pas probleme të shumta në verën e vitit të shkuar kur shërbimet e kësaj kompanie kolapsuan për shumë ditë. /korrieri
