Vëllezërit, Xhino dhe Marsel Roka pjesë e grupit të Suel Çelës, pse mbahet ende në detyrë kreu i AZHT Adelajda Roka ?!
SPAK goditi grupin e Suel Çelës disa ditë më parë duke arrestuar një numër të madh personash, ndërsa të tjerë u shpallën në kërkim. Në listën e SPAK si anëtarë të grupit të Çelës ishin edhe dy vëllezërit Xhino Roka dhe Marsel Roka.
Rezulton se ata janë vëllezërit e kreut të Agjencisë Zhvillimit të Territorit, Adelajda Roka. Parimi i drejtësisë është që përgjegjësia është personale, megjithatë roli që ka Adelajda Roka në AZHT është shumë speficik, pasi bëhet fjalë për institucionin që përgatit dosjet për dhënien e lejeve të ndërtimit për kullat dhe fshatrat turistik.
BE dhe SHBA kanë dhënë alarmin për pastrimin e parave të krimit pikërisht në kulla dhe fshatra turistik në Shqipëri duke e bërë largimin e Adelajda Rokës nga AZHT jo më një çështje morale, por të ngjashme me çështje të sigurisë kombëtare, për aq kohë sa është dhënë alarmi për pastrim masiv parash përmes ndërtimit.
Çfarë bën AZHT, e drejtuar nga Adelajda Roka
Agjencia e Zhvillimit të Territorit kryen funksionet e sekretariatit teknik të Këshillit Kombëtar të Territorit dhe ka përgjegjësi për të pranuar dokumentacionin për shqyrtim dhe miratim në Këshillin Kombëtar të Territorit, organizuar mbledhjet e KKT-së si dhe përgatitur dhe administruar dokumentacionin që shqyrtohet në to. Agjencia në fjalë jep llogari vetëm përpara kryeministrit Edi Rama dhe kreu i qeverisë është i vetmi që emëron apo liron nga detyra Drejtorin/eshën e kësaj Agjencie.
Mbajtja e Adelajda Rokës ende në detyrë në situatën e krijuar tregon me sa duket një konformizëm të qeverisë me çfarë po ndodh vitet e fundit në Shqipëri. Kësaj radhe, duket qartë që familjarët e Adelajda Rokës nuk kanë ngrënë vetëm “dardha dhe kumbulla pas shpine”, por kanë “vjelë një parcel të tërë”.
SPAK goditi grupin kriminal të Suel Celës, një organizatë me bazë në Elbasan për trafikun ndërkombëtar të kokainës nga Amerika Latine dhe shpërndarjen e saj në vende të Bashkimit Evropian. Banda kriminale, e cila synim kryesor ka pasur kontrollin e territorit kryesisht në Shqipërinë e Mesme, sipas SPAK, kishte depërtuar në sistemin e drejtësisë, në polici dhe në media, për të favorizuar anëtarët e organizatës kriminale, për të rënduar pozitën e kundërshtarëve, dhe për të goditur deri në vrasje, pjesëtarët e grupeve rivale të fisit Çopja. /korrieri
