Në Shqipëri, edhe këtë fundviti një numër jo i vogël i familjeve dhe të miturve vazhdojnë të përballen me probleme ekonomike dhe sociale. Mes tyre janë edhe jetimët dhe fëmijët e braktisur. Siç njofton korrespondenti i Zërit të Amerikës, Pëllumb Sulo, në institucionet rezidenciale të përkujdesit shoqëror në Shqipëri strehohen 481 fëmijë jetim, ndërkohë që numri i jetimëve, sipas shoqatës kombëtare të jetimëve, është rreth 21 mijë.
Ndryshe nga atmosfera e zhurmshme festive në qendrën e qytetit të Shkodrës, afër periferisë, në Shtëpinë e Fëmijëve 6 deri në 15 vjeç, atmosfera është më e qetë, në pritje të shoqatave, biznesmenëve apo qytetarëve që, thotë punonjësja sociale e kësaj shtëpie, si çdo vit, sjellin dhurata për fëmijët jetim të kësaj shtëpie, e cila është një nga më të vjetrat në Shqipëri.
“Aktualisht kemi 29 fëmijë rezidentë. Fëmijët vijnë nga rrethe të ndryshme të vendit, kryesisht janë fëmijë jetim social, që do të thotë se vijnë nga familje me probleme social-ekonomike. Këtë fundiviti ne po përgatitemi që fëmijët ta kalojnë sa më gëzueshëm, sa më të lumtur dhe t’ua plotësojmë sa të jetë e mundur boshllëkun e madh që kanë, familjen e tyre biologjike”, tregon ajo.
Mes femijëve të Shtëpisë së Fëmijëve 6-15 vjeç në Shkodër është edhe Asllani 9-të vjeçar, një jetim social që vjen nga qendra e Shqipërisë.
“Jam shumë i lumtur për këtë vit. Dëshiroj që të gjithë fëmijët të jenë të lumtur në këtë fundviti dhe uroj që të gjithë fëmijëve t’u plotësohen dëshirat”, thotë ai.
Ashtu si të gjithë fëmijët jetim, dëshira më e madhe e Asllanit është që të bashkohet me prindërit e tij.
“Dëshira ime më e madhe për këtë Vit të Ri është që të jem me familjen dhe të ndihmoj familjen për çdo gjë që të ketë nevojë”.
Sipas të dhënave zyrtare nga Ministria e Shëndetësisë dhe Mbrojtjes Sociale në institucionet rezidenciale, publike dhe jopublike në Shqipëri, strehohen 481 fëmijë jetim. Ndërsa, vetëm gjatë 5 viteve, nga 2019 deri në 2023, janë shpallur të braktisur me vendim gjykate 118 fëmijë. Në Shqipëri janë ngritur 79 qendra rezidenciale të përkujdesit social për fëmijët dhe të moshuarit, pjesa më e madhe në Shkodër dhe Tiranë.
Shtëpia e Fëmijëve në Shkodër është njëra prej tyre. Mësuesja Aurora Piroviç thotë se 21 nga 29 fëmijët e kësaj qendre mësojnë në shkollën “Salo Halili” të qytetit. Me nismën e tyre nxënësit kanë përgatitur një kalendar dhe, të ardhurat nga shitja e tyre, ata po ia dhurojnë fëmijëve jetim.
“Mbështetjen këta fëmijë e kanë jo vetëm nga mësuesit dhe prindërit që janë pjesë e komunitetit të shkollës tonë, por edhe nga vetë bizneset dhe qytetarët jo vetëm të Shkodrës, Tiranës, Prishtinës, kudo ku ne i kemi shitur kalendarët e përgatitur nga nxënësit. Besoj se edhe në të ardhmen do të kemi projekte, jo vetëm për gjithëpërfshirjen e fëmijëve, por edhe në mbështetje të kauzës së fëmijëve jetim”, tregon ajo.
Sipas Shoqatës Kombëtare të Jetimëve në Shqipëri, 21 mijë fëmijë të moshës deri në 16 vjeç janë jetim biologjik ose jetim social. 7500 prej tyre kanë vetëm njërin prej prindërve, ndërsa 1150 nuk i kanë të dy prindërit. Problemet sociale, si emigracioni, divorcet, kriminaliteti, papunësia dhe varfëria, kanë rritur numrin e jetimëve social, të cilët prindërit detyrohen t’i dërgojnë në qendrat e përkujdesjes shoqërore./VOA
