Kursi i këmbimit Euro-Lek e ka nisur javën me rënie dhe ka arritur një minimum të ri historik.
Sipas kursit zyrtar të këmbimit të Bankës së Shqipërisë, monedha europiane u këmbye të hënën me 97.93 lekë, niveli më i ulët i shënuar ndonjëherë.
Agjentët e këmbimit valutor mendojnë se rënia e Euros është e lidhur me prurjet e mëdha valutore të këmbyera gjatë fundjavës.
Fundjava e kaluar solli një fluks i lartë vizitorësh të huaj, kryesisht nga vendet fqinje.
Me nisjen e sezonit veror dhe me rritjen e temperaturave, ka nisur edhe rritja e fluksit të vizitorëve në bregdetin shqiptar gjatë fundjavave.
Gjithashtu, një ndikim shtesë vlerësohet se mund të ketë pasur edhe ndeshja e futbollit Shqipëri-Serbi, që solli drejt vendit tonë një numër të madh të vizitorëve nga Kosova.
Në fakt, rënia e kursit të këmbimit ndodhi kryesisht gjatë fundjavës, duke përfshirë edhe të premten, që ishte ditë pushimi zyrtar. Madje, në ditët e fundjavës kursi mesatar ishte edhe më i ulët, duke qenë se zyrat e këmbimit valutor aplikuan kurs edhe më të ulët në blerje të valutës.
Të hënën, kursi në blerje shënoi një korrektim në rritje, por gjithsesi tendenca e fundjavës u reflektua në kursin zyrtar, në një minimum të ri historik.
Edhe këtë vit kursi i këmbimit Euro-Lek po shfaq sërish një përsëri rënëse, duke filluar nga tremujori i dytë i vitit. Agjentët mendojnë se këto presione do të jenë të pranishme gjatë gjithë verës.
Një tendencë e tillë u vërejt qartë edhe vitin e kaluar, kur Banka e Shqipërisë ndërhyri duke kryer blerje të mëdha të valutës, për të mos lejuar forcimin e mëtejshëm të Lekut. Banka Qendrore bleu afërsisht 933 milionë euro në tregun e brendshëm valutor në 2024, në vlerën më të lartë historike.
Burime nga tregu bëjnë të ditur se Banka e Shqipërisë i rifilloi blerjet përsëri në muajin maj dhe është e pritshme që ato të vazhdojnë gjatë muajve të verës. Për sa kohë që inflacioni ndodhet poshtë objektivit prej 3%, ndërhyrja e Bankës së Shqipërisë mund të justifikohet nga ky këndvështrim.
Megjithatë, në muajt e fundit po vërehet një tendencë e lehtë në rritje e inflacionit, që në prill arriti në 2.3%. Një pjesë e mirë e artikujve të konsumit duket se po shtrenjtohen përsëri dhe kërkesa në rritje që gjeneron sezoni turistik mund t’i japë vijimësi rritjes së çmimeve.
Në një skenar të tillë, hapësirat që Banka e Shqipërisë ta frenojë rënien e mëtejshme të kursit të Euros mund të jenë më të vogla./Monitor
