Partia Socialiste luan në avancë, me fokus të qartë, largimin e Erion Veliaj nga çdo post drejtues. Larg vëmendjes së mediave dhe me një mbledhje që s’dihet se ku u mbajt, mësohet se Asambleja e Shoqatës Kombëtare të Bashkive ka vendosur shkarkimin e Veliajt nga drejtimi i këtij institucioni dhe emërimin e kryebashkiakes së Durrësit, Emirjana Sako, si pasuese e tij.
Ky vendim vjen vetëm pak ditë përpara mbledhjes së Këshillit Bashkiak të Tiranës më 23 shtator, ku pritet formalizimi i shkarkimit të Veliajt edhe nga posti i kryebashkiakut të kryeqytetit.
Veliaj, që prej shkurtit është burgosur në Durrës, tashmë mungon fizikisht dhe politikisht në zyrën e Bashkisë Tiranë, duket se është lënë në harresë nga vetë partia që e promovoi, duke pësuar një izolim dhe largim të planifikuar.
Në mënyrë domethënëse, lëvizja vjen nga brenda vetë radhëve të majta: pjesa më e madhe e anëtarëve të Shoqatës janë kryetarë bashkish të PS-së, një tregues që goditja ndaj Veliajt tashmë është vendosur dhe jo thjesht një vendim teknik.
Ndërkohë, fuqizimi i Emirjana Sakos në krye të Shoqatës Kombëtare të Bashkive shihet nga analistët si një sinjal i qartë se PS po riorganizon qeverisjen vendore, duke e fuqizuar peshën politike në Tiranë dhe Durrësit. Ky rikonfigurim i brendshëm, në një moment kur pritet vendimi për zgjedhjet e parakohshme lokale në Tiranë, tregon jo vetëm një ndryshim kursi, por edhe një spastrim të heshtur politik brenda vetë partisë.
Mesa duket e Marta do jetë thjesht një “pasim” topi për Këshillin Bashkiak, për të nxjerrë nga loja e madhe politike Erion Veliajn.
