Ilir Alimehmeti ka folur në Euronews Albania mbi mundësinë e kandidimit për Bashkinë e Tiranës, duke lënë të kuptohet se nuk është ky fokusi i tij kryesor.
“Jemi akoma të fokusuar te shkarkimi i Erion Veliajt. Ka një farë vonese nga Partia Demokratike. Ishte e qartë që do vinte kjo ditë. Kemi dy krahë pune: një për të demontuar Veliajn me shkresa, çuarje para drejtësisë, protesta para bashkisë dhe qëndresë në këshill. Aspekti tjetër është për të shkuar drejt konkurrimit me kë do vinte PS-ja,” – u shpreh Alimehmeti.
Ai theksoi se nuk synon “projekte afatshkurtra dhe të momentit”, duke shtuar se do të mbështesë kandidatin që do të vendosë PD.
“Jam lojtar grupi. Jam për një platformë që mund të zbatohet, që do kohën e vet dhe besoj në projekte politike afatgjata. Në momente kur nuk mund të shkoj me grup dhe platformë, unë jam kryetar i këshilltarëve në Bashkinë Tiranë dhe do të vazhdoj punën aty. Do mbështes kandidatin e PD, kushdo që të jetë,” – tha Alimehmeti.
