Qeveria shqiptare ka miratuar një vendim që konfirmon edhe një herë lidhjen e ngushtë mes pushtetit dhe biznesit të madh. Vendimi i fundit i Këshillit të Ministrave i jep garanci Bankës së Tiranës, pjesë e grupit Balfin të Samir Manes, për një kredi prej 20 milionë eurosh që u jepet kompanive publike të energjisë.
Në dukje, paratë i shkojnë Furnizuesit të Shërbimit Universal (FSHU), OSHEE Group, OSSH dhe FTL.
Por në thelb, garancia e qeverisë zhvendos gjithë riskun financiar tek qytetarët shqiptarë, shkruan Korrieri.
Garancia e qeverisë, fitim i sigurt për bankën
Sipas vendimit, nëse kompanitë e energjisë nuk shlyejnë kredinë, pagesa do të mbulohet nga buxheti i shtetit. Kjo do të thotë se Banka e Tiranës nuk ka asnjë risk: çdo cent i kredisë është i garantuar nga taksat e shqiptarëve.
Praktikisht, fitimi i bankës dhe i Samir Manes është i siguruar paraprakisht, ndërsa barrën e mbart qytetari.
Ky është një mekanizëm tipik ku fitimi privat bëhet i sigurt, ndërsa humbja kolektivizohet. Shqiptarët paguajnë energjinë tek OSHEE përmes faturave mujore dhe, nëse kredia nuk shlyhet, taksat e tyre mbulojnë edhe këstet e bankës.
Ky nuk është rasti i parë kur shteti vihet në dispozicion të interesave të Samir Manes.
Më herët, kompani të lidhura me të kanë përfituar projekte gjigante në infrastrukturë dhe turizëm.
Nga ndërtimi i tuneleve tek resortet buzë bregdetit, investimet e Manes kanë marrë shpesh mbështetje ose lehtësi të drejtpërdrejta nga shteti.
Vendimi aktual për garancinë e kredisë është vetëm një hallkë e re në të njëjtin zinxhir.
Në këtë mënyrë, krijohet një model i përsëritur: shteti merr përsipër riskun financiar, ndërsa biznesi privat korr fitimet.
Qytetarët mbeten të pambrojtur dhe të detyruar të paguajnë faturën, qoftë nëpërmjet shërbimeve të shtrenjta, qoftë nëpërmjet buxhetit të shtetit.
Kjo marrëveshje ngre dyshime të forta mbi prioritetet e qeverisë dhe mënyrën se si menaxhohen financat publike.
Në një kohë kur qytetarët përballen me rritje çmimesh dhe shërbime të kufizuara, buxheti përdoret për të garantuar fitimin e një banke private që i përket një biznesmeni tashmë miliarder.
Vendimi është botuar në “Fletoren Zyrtare” dhe ka hyrë në fuqi menjëherë.
Ai tregon qartë se qeveria është e gatshme të marrë përsipër riskun për interesat e një individi të vetëm, duke e kthyer taksapaguesin shqiptar në garant të heshtur të kredive bankare.
Në përfundim, ky rast është ilustrim i pastër se si shteti shndërrohet në mjet sigurie për bizneset e mëdha, ndërsa qytetari mbetet pa zë dhe pa mbrojtje.
Modeli i përsëritur i favorizimit të Samir Manes përbën jo thjesht një vendim të diskutueshëm financiar, por një simptomë të një sistemi ku pushteti dhe kapitali privat gërshetohen në dëm të interesit publik. /korrieri
