Prokuroria e Fierit ka shpallur moskompetencën dhe ka vendosur t’ia përcjellë dosjen e kompanisë Bankers PetroleumProkurorisë së Posaçme Kundër Korrupsionit dhe Krimit të Organizuar (SPAK).
Burime të besueshme nga organi i akuzës në Fier kanë konfirmuar për vna se gjatë hetimeve janë zbuluar lidhje të zyrtarëve të lartë shtetërorë dhe implikim i tyre në këtë çështje, çka i jep kompetencën vetëm SPAK-ut për ta ndjekur më tej dosjen.
Sipas të dhënave, hetimet e deritanishme kanë evidentuar shkelje të rënda dhe abuzime nga drejtues dhe ish-drejtues të kompanisë, të cilat i kanë shkaktuar shtetit shqiptar dëme prej miliona eurosh. Në këtë kuadër, prokuroria ka firmosur 14 masa sigurie, disa prej të cilave në formën e arrestit me burg.
Vetëm ndaj shtetit shqiptar, Bankers Petroleum rezulton me një detyrim prej 240 milionë eurosh të papaguar. Përtej borxhit financiar, hetimet kanë zbuluar edhe ekzistencën e një rrjeti të gjerë bashkëpunimi të fshehtë dhe favorizimesh të paligjshme, përfshirë ndikimin mbi institucione kyçe, që kanë lejuar kompaninë të operojë për vite të tëra pa u ndëshkuar.
Çështja tashmë pritet të trajtohet nga SPAK, i cili ka në kompetencë hetimin e korrupsionit në nivele të larta dhe skemave të organizuara që kanë ndikuar drejtpërdrejt në interesin publik dhe financat e shtetit./korrieri
