Humbja e Serbisë ndaj Shqipërisë me rezultatin 1-0, në kuadër të ndeshjeve kualifikuese për Kupën e Botës 2026, ka shkaktuar reagime të shumta në opinionin publik serb. Një ndër të parët që ka reaguar publikisht është vetë Presidenti i Serbisë, Aleksandar Vuçiç, i cili e ka cilësuar disfatën si “të rëndë dhe zhgënjyese”. Në një prononcim për mediat serbe, Vuçiç është shprehur se humbja e përfaqësueses serbe e ka prekur emocionalisht dhe e ka lënë pa gjumë gjatë natës.
“Nuk ishim një ekip i përgatitur mirë. Jemi të zhgënjyer. Ishte një humbje shumë e vështirë. Nuk munda të flija nga trishtimi, jo nga zemërimi si disa të tjerë. Ka njerëz që dinë vetëm të prodhojnë zemërim. Por çfarë kemi bërë realisht për ekipin kombëtar?”, – deklaroi Vuçiç.
Kreu i shtetit serb ndaloi gjithashtu tek aspekti i mikpritjes që, sipas tij, Serbia i kishte ofruar përfaqësueses shqiptare gjatë ndeshjes së zhvilluar në territorin serb. Ai theksoi se çdo gjë kishte qenë në rregull dhe se shteti serb kishte treguar korrektësi e respekt ndaj kundërshtarëve.
“A kishim gjithçka? Po. Ishim mikpritës të mirë për shqiptarët, gjithçka ishte në rregull. Kjo është ajo që bëmë. E gjeta veten duke kritikuar me të drejtë, por a i mbështeta ata njerëz? Edhe pse dola në stadium, nuk duartrokita. Jo sepse nuk doja, por sepse isha i lodhur. Për mua ishte më e rëndësishme të pushoja pas një dite të gjatë, sesa të mbështesja ekipin,” – u shpreh Vuçiç.
Megjithatë, pavarësisht kritikave dhe zhgënjimit të shprehur, presidenti serb theksoi se dashuria dhe përkushtimi i tij ndaj kombëtares serbe mbeten të palëkundura.
“E dua ekipin kombëtar serb dhe më vjen keq që nuk isha aty për të treguar dashurinë time për flamurin tonë. Kur isha fëmijë, brohorisja me gjithë zemër, sidomos kur humbnim 3:0 apo 4:0. Atëherë isha më i zhurmshmi,” – përfundoi Vuçiç.
