Kreu i PD-së, Sali Berisha, ka deklaruar pas protestës se “pjesëmarrja ishte historike”.
“Opozita ka vetëm betejë! Afera më e padëgjuar ndonjëherë në histori i ka rrënjët në Surrel Afera më e padëgjuar ndonjëherë në histori i ka rrënjët në Surrel. Gjithçka është bërë, mund të jenë zhdukur njerëzit, nuk e di, por tre herë janë marrë peng, kjo dihet. Unë dija vetëm një, këto kohë dolën që janë dy të tjerë. 700 milionë euro, çdo gjë për familjen, që Armandi të pasuronte familjen Rama. Atëherë ai është një pallat krimi atje. Nuk ka diskutim kjo. Aksioni i sotëm mbyllet tek selia. Thashë të bëjmë një xhiro këto që misionarët e lirisë të bëjnë një njohje të terrenit në çdo anë…Pjesëmarrja ishte jashtëzakonisht e kënaqshme. Ishte historike edhe mbështetja, edhe entuziazmi, edhe të gjitha”, tha Berisha, pas mbërritjes në selinë blu, bashkë me një pjesë të protestuesve.
Partia Demokratike zhvilloi sot protestën e paralajmëruar kombëtare përpara godinës së Kryeministrisë, ku kërkon dorëheqjen e kryeministrit Edi Rama. Sapo kryedemokrati Sali Berisha përfundoi fjalën e tij, nisën përplasjet e para mes protestuesve dhe Policisë, teksa u hodhën shishe molotivi drejt godinës së Këshillit të Ministrave.
Protesta erdhi pas deklaratave të forta të kryetarit të PD-së, i cili më 20 dhjetor paralajmëroi se ky tubim do të jetë vetëm fillimi i një rezistence më të gjerë kundër qeverisë Rama. Në komunikimet me mbështetësit, Berisha nuk përjashtoi as forma të tjera të aksionit politik, përfshirë nisma paralele, akte ekstreme të ngujimit. Policia ka ndërmarrë masa sigurie, përpara nisjes së tubimit.
