Ekonomia shqiptare pritet të ruajë një ritëm të qëndrueshëm rritjeje gjatë viteve 2026 dhe 2027, e mbështetur kryesisht nga turizmi dhe sektori i ndërtimit, por perspektiva afatmesme vijon të kushtëzohet nga sfida strukturore, demografia dhe pasiguritë e jashtme.
Kështu vlerëson raporti “World Economic Situation and Prospects 2026”, i publikuar nga Departamenti për Çështjet Ekonomike dhe Sociale i Kombeve të Bashkuara.
Sipas raportit, Shqipëria bën pjesë në grupin e ekonomive të Europës Juglindore që kanë përfituar ndjeshëm nga sezoni turistik shumë i fortë i vitit 2025, me flukse vizitorësh që arritën nivele rekord gjatë muajve të verës.
Turizmi ka qenë një nga motorët kryesorë të rritjes ekonomike, duke nxitur aktivitetin në shërbime, transport dhe tregti, ndërsa paralelisht sektori i ndërtimit ka dhënë një kontribut të rëndësishëm në zgjerimin e aktivitetit ekonomik në vend.
Parashikimet e OKB tregojnë se rritja reale e Prodhimit të Brendshëm Bruto të Shqipërisë pritet të mbetet mbi mesataren e rajonit edhe në vitin 2026, ndonëse me një ritëm më të moderuar krahasuar me fazën e rimëkëmbjes pas pandemisë. Në të njëjtën kohë, inflacioni në Shqipëri vlerësohet të jetë relativisht i stabilizuar, në nivele rreth 2.5 për qind gjatë viteve 2026 dhe 2027, duke reflektuar lehtësimin e presioneve të çmimeve që u shfaqën pas krizës energjetike dhe goditjeve globale të ofertës.
Raporti thekson gjithashtu se tregu i punës në Europën Juglindore ka shfaqur përmirësim gradual, me rritje të punësimit dhe paga reale më rezistente ndaj inflacionit. Megjithatë, Shqipëria, ashtu si vendet e tjera të rajonit, përballet me një nivel relativisht të ulët të pjesëmarrjes në forcën e punës, veçanërisht te gratë, si dhe me sfida të vazhdueshme që lidhen me emigracionin dhe tkurrjen e popullsisë në moshë pune.
Në planin e rreziqeve, OKB paralajmëron se perspektiva ekonomike e Shqipërisë mbetet e ekspozuar ndaj pasigurive të jashtme, përfshirë ngadalësimin ekonomik në Bashkimin Europian, që është partneri kryesor tregtar i vendit, si dhe ndaj pasojave të ndryshimeve klimatike. Rritja e frekuencës së thatësirave përbën një risk konkret për prodhimin e energjisë hidrike, një sektor kyç për ekonominë shqiptare.
Në vlerësimin e përgjithshëm, raporti nënvizon se megjithëse Shqipëria ka përfituar nga cikli i fortë i turizmit dhe investimeve në ndërtim, zhvillimi afatgjatë do të varet nga përmirësimi i klimës së biznesit, rritja e produktivitetit dhe adresimi i sfidave demografike. Pa reforma strukturore më të thella, rritja ekonomike rrezikon të mbetet e përqendruar në sektorë ciklikë dhe të ndjeshëm ndaj goditjeve të jashtme./monitor.al
