Ish-ministri i Financave, Arben Malaj, ka ngritur kritika ndaj mënyrës si po trajtohet projekti i portit të ri në Porto Romano, duke e cilësuar procesin si të shoqëruar me gabime serioze në vendimmarrje.
Në një deklaratë publike, Malaj theksoi se nuk mund të ndërpritet aktiviteti i Portit të Durrësit pa qenë më parë funksional një port i ri që të marrë përsipër fluksin tregtar dhe detar.
Sipas tij, logjika e ndjekur është e kundërt me atë që kërkon një projekt i kësaj natyre.
“Duhej ndërtuar porti i ri dhe më pas të lirohej porti ekzistues. Nuk mund të bllokohet aktiviteti pa pasur një alternativë funksionale. Këtu kemi gabime nga më elementaret”, u shpreh Malaj.
Ai kritikoi edhe projektin e zhvillimit urban në zonën e portit aktual, duke theksuar se lirimi i hapësirës po bëhet për një projekt ndërtimi banesash, ndërkohë që sipas tij mungon qartësia për mënyrën e realizimit të investimit.
Malaj u ndal gjithashtu te procesi i garës për projektin dhe mundësia e anulimit të saj, duke paralajmëruar për pasoja financiare dhe procedurale.
Sipas tij, ndërprerja e një gare mund të sjellë kosto të drejtpërdrejta, ndërsa përdorimi i termave si “anulim” apo “tërheqje” mund të krijojë hapësira për zhvillime të reja në proces.
Ai vlerësoi se në këtë situatë mund të rrezikohet humbja e rreth 8.2 milionë eurove, ndërkohë që ekziston mundësia që kompani të tërhequra nga gara të rikthehen sërish në të.
Ish-ministri ngriti gjithashtu shqetësime për mungesën e transparencës në strukturën e kompanive të përfshira në projekt, duke theksuar se disa prej tyre janë të regjistruara në juridiksione offshore.
“Ka kompani që përdorin struktura offshore, por zakonisht jo për të gjithë aktivitetin e tyre. Në këtë rast nuk dihet qartë kush janë pronarët përfitues”, deklaroi Malaj, duke theksuar nevojën për më shumë transparencë dhe kontroll mbi projektin.
