Eurodeputeti Fredi Beleri gjatë një interviste për Euronews Albania ka folur mbi qëndrimin e kryministrit Rama gjatë Forumit Ekonomik në Delphit i cili përmendi çështjen e Fredi Belerit.
Rama tha se një kryebashkiak do ta kishte ëndërr që të dilte nga burgu edhe të bëhej eurodeputet, por sot vazhdojnë të jenë në burg duke iu referuar rastit të Veliaj. Kryministri e pranoi se çështja Beleri ndikoi në marrëdhënien mes dy vendeve.
Vetë Fredi Beleri e ka quajtur padrejtësi të dytë faktin që Rama e krahason me Veliajn, pasi sipas tij, Veliaj akuzohet për qindra mijëra euro, ndërsa vepra penale e Belerit e supozuar ishte 360 euro. Për ato 360 euro qëndroi në burg 16 muaj.
“Fakti që unë sot kam luksin të jem deputet dhe kam nderin të jem votuar nga 250.000 qytetarë grekë, nuk më bën aspak të harroj padrejtësinë që më ka bërë zoti Rama.
Nuk kam harruar kurrë 4.000 votuesit e Himarës, vota e të cilëve nuk u respektua në Shqipëri. Ishin pikërisht ato 4.000 vota që sollën 250.000 vota të qytetarëve grekë dhe sot më bënë parlamentar. Zoti Rama besoj se bën një padrejtësi të dytë duke më krahasuar me kryebashkiakë të Partisë Socialiste si zoti Veliaj.
Duke dashur të mos shprehem për fajësinë apo pafajësinë e zotit Veliaj, dua t’i them zotit Rama se zoti Veliaj akuzohet për qindra mijëra euro, ndërsa vepra ime penale e supozuar ishte 360 euro.
Për ato 360 euro kam qëndruar në burg 16 muaj. Pra, anashkalimi i kësaj problematike nuk është kaq i lehtë për mua që kam vuajtur. Zoti Rama duhet të dijë se në Bashkimin Evropian, ku Shqipëria synon të anëtarësohet, respektimi i votës së popullit është i panegociueshëm.”-tha Fredi Beleri.
Fredi Beleri u ndal te reforma në drejtësi, duke u shprehur se njerëzit po mbahen padrtejtësisht në burg. Ai e ka quajtur hipokrizi narrativën e Ramës atëherë edhe tani pasi nuk është e qartë se në dorën e kujt është drejtësia.
“Shumë herë nëpër intervista ka dalë dhe ka thënë që ideatori dhe ai që bëri reformën në drejtësi është zoti Rama. Por kemi një reformë të mirë drejtësie apo një reformë që mban njerëzit padrejtësisht në burg? Unë ndihem krenar që të gjitha argumentet e mia kur isha në burg, sot zoti Rama i përdor.
Besoj se edhe atëherë ishte hipokrit, edhe sot është hipokrit. Retorika e zotit Rama ndaj meje ishte që drejtësia është e pavarur. Sot fajin e kanë gjykatësit. Edhe atëherë ishte pa vend, edhe sot është pa vend. Ndërhyrja e pushtetit ekzekutiv ndaj gjyqësorit nuk mund të ndodhë në një vend demokratik.
Zoti Rama është mësuar t’i mbajë këto qëndrime dhe të mos ndëshkohet nga populli shqiptar, ndaj vazhdon t’i bëjë. Besoj se zbutja e tij ka të bëjë me faktin që Rama dhe qeveria e tij janë në momentin më të keq gjatë këtyre 13 viteve.
Ka të bëjë me integrimin, me çështjen aktuale në Shqipëri, me varfërinë, me reformat që nuk po avancojnë, me shtetin e së drejtës që shkon nga e keqja në më të keqen. Nuk ka një aspekt ku Shqipëria të ketë përparim.
Sigurisht, unë besoj se nuk duhej të kisha bërë asnjë ditë burg, ashtu si shumë shqiptarë që janë sot në burg. Jemi shteti i vetëm ku 60% e të burgosurve janë në statusin e të paraburgosurit. Kjo nuk është demokraci.
Këta njerëz nuk janë rastësisht në burg, por i mban gjyqësori i zotit Rama me një qëllim: për t’i frikësuar dhe për t’i manipuluar për zgjedhje. Zoti Rama nuk dilte nëpër televizione dhe kërcënonte shqiptarët. Nuk paguan dritat, shkon në burg. Bën ndërtim pa leje, shkon në burg. Por nëse bën kulla, je mik i qeverisë”-u shpreh Beleri.
“Ka një shprehje: kur luani është fqinj, gjithmonë ka mundësi që luani të të hajë. Tani luani është zoti Rama. Ai viktimizohet dhe sot kontrollon plotësisht pushtetin”- tha Beleri.
