Forcat e Armatosura të Greqisë janë vënë në gjendje alarmi pas zbulimit të një anijeje pa pilot në zonën e Lefkada, një rast që po trajtohet me nivel të lartë sigurie nga shërbimet speciale dhe njësitë ushtarake.
Sipas informacioneve paraprake, hetimet janë marrë në dorë nga Komanda e Operacioneve Nënujore, ndërsa autoritetet po analizojnë me kujdes karakteristikat teknike të mjetit dhe pajisjeve që dyshohet se ndodheshin në të.
Burimet ushtarake bëjnë me dije se provat e para tregojnë për praninë e detonatorëve dhe eksplozivëve, çka ngre dyshime se mjeti mund të ketë qenë i përgatitur për një sulm të mundshëm.
Autoritetet po hetojnë gjithashtu mënyrën se si anija pa pilot ka mbërritur në Lefkadë, me një skenar të mundshëm që ajo të jetë transportuar me një mjet tjetër detar, pasi kalimi autonom në distanca të mëdha konsiderohet i vështirë nga ekspertët.
Sipas raportimeve, teknologjia e përdorur ngjan me modelet e njohura të anijeve pa pilot të tipit “Magura”, të zhvilluara në kuadër të luftës në Ukrainë. Këto mjete përdorin navigim satelitor dhe sisteme komunikimi me rreze të gjatë veprimi. Hetimet vijojnë në kushte të rrepta sigurie, ndërsa autoritetet greke nuk kanë dhënë ende një deklaratë zyrtare mbi origjinën e mundshme të mjetit apo objektivat e tij.
