Policia e Shtetit ka shpërndarë një telegram urgjent dhe të klasifikuar për të gjitha drejtoritë vendore në vend, ku pranon zyrtarisht se situata e drogës dhe armëve pranë shkollave është kthyer në një problem serioz sigurie.
Dokumenti, i firmosur nga Drejtori i Përgjithshëm i Policisë, Skënder Hita, flet hapur për ngjarje të ndodhura brenda dhe pranë institucioneve arsimore gjatë vitit shkollor 2024-2025, ku nxënës janë kapur me lëndë narkotike, armë të ftohta dhe sende të tjera të ndaluara, ndërsa disa raste kanë sjellë pasoja për jetën, shëndetin dhe aktivitetin normal mësimor.
Por pjesa më e fortë e dokumentit është fakti se vetë Policia pranon se situata është përkeqësuar edhe për shkak të “punës së dobët” të strukturave të saj.
Në telegram thuhet se strukturat policore:
nuk kanë siguruar informacion në kohë për shpërndarjen e drogës pranë shkollave, nuk kanë organizuar kontrolle efektive dhe kanë bashkëpunuar dobët me drejtuesit e shkollave dhe oficerët e sigurisë.
Pikërisht për këtë arsye, drejtoria e përgjithshme urdhëron masa emergjente në të gjithë vendin.
Agjentë të policisë kriminale do të angazhohen pranë shkollave, do të ketë kontrolle të befasishme nga antidroga dhe forcat operacionale, ndërsa kërkohet kapja në flagrancë e personave që shpërndajnë drogë pranë institucioneve arsimore.
Në dokument kërkohet gjithashtu intensifikimi i metodave speciale të hetimit, si dhe përfshirja e strukturave të krimit ekonomik për të ndaluar shitjen e produkteve të ndaluara për të miturit.
Policia paralajmëron se drejtuesit vendorë dhe efektivët që nuk zbatojnë urdhrat apo neglizhojnë situatat do të përballen me përgjegjësi disiplinore.
Telegrami është një nga dokumentet më të forta të muajve të fundit, pasi për herë të parë vetë Policia e Shtetit pranon në mënyrë të drejtpërdrejtë jo vetëm përhapjen e drogës pranë shkollave, por edhe dështimet e saj për ta parandaluar fenomenin në kohë.
