Gazetarja Klodiana Lala deklaroi se grupet kriminale shqiptare kanë përdorur banka, zyra këmbimi valutor, noterë dhe rrjete ekspertësh për të pastruar paratë e përfituara nga trafiku i drogës.
Sipas saj, rreziku që paratë e pista të investohen në Shqipëri mbetet shumë i lartë, veçanërisht për shkak të aktivitetit të grupeve kriminale shqiptare në Amerikën Latine.
“Kemi një agjent të DEA-s që është stacionuar prej muajsh në Shqipëri dhe po punon për grupet kriminale që janë vendosur në Amerikën Latine. Rrisku që paratë e pista të vijnë në Shqipëri është shumë i lartë”, tha Lala.
Ajo u ndal edhe te pasuritë e dyshuara të disa personave të përfshirë në trafikun ndërkombëtar të kokainës, duke ngritur pikëpyetje se ku kanë përfunduar milionat e përfituara nga aktiviteti kriminal.
“Dritan Gjika nuk ka pasuri të sekuestruar në Shqipëri. Ai ose i ka në kripto, ose të investuara në një vend tjetër. Armando Pacani dyshohet se ka fituar miliona euro nga shitja e kokainës, por shtëpia ku jeton nëna e tij nuk është më shumë se 60 metra katrorë, me mobilje të vjetra. Ku janë paratë? Janë investuar diku. Ne kemi vetëm majën e ajsbergut”, u shpreh gazetarja.
Lala tha se pas këtyre grupeve qëndrojnë rrjete të mirëorganizuara ekspertësh, avokatësh dhe bashkëpunëtorësh në sistemin financiar.
Sipas saj, ndërsa një qytetar i zakonshëm përballet me kontrolle të shumta edhe për depozitime prej 10 mijë eurosh, në raste të tjera shuma nga 1 deri në 5 milionë euro kanë lëvizur pa ngritur alarm te strukturat përgjegjëse për parandalimin e pastrimit të parave.
“Si ka mundësi që lëvizin 1 deri në 5 milionë euro dhe asnjë punonjësi të pastrimit të parave nuk i bën përshtypje?”, tha Lala.
Gazetarja përmendi edhe rastin e grupit Pepa, ku sipas saj u zhdukën 4 milionë euro nga llogaria e një notereje, ndërsa anëtarët e grupit kishin planifikuar edhe marrjen peng të një drejtori banke.
“Rrjetet e exchange-ve dhe noterët janë të dyshuar si të përfshirë në skema pastrimi parash. Te grupi Pepa u zhdukën 4 milionë euro nga llogaria e noteres dhe ata planifikonin të merrnin peng drejtorin e një banke. Kjo mund të ketë ndodhur dhe të mos jetë raportuar”, deklaroi ajo.
Në fund, Lala ngriti edhe çështjen e përfshirjes së mundshme të zyrtarëve, duke theksuar se duhen hetuar rastet kur kompani me bilance të ulëta shfaqen me investime dhjetëra apo qindra milionë euro.
“Vjen një kompani të investojë 100 milionë euro, ndërkohë që bilanci i saj është shumë i ulët”, tha gazetarja.
