Analizat e ADN-së kanë konfirmuar se trupi i pajetë i gjetur disa ditë më parë në zonën e Cërunjës i përket 34-vjeçarit Eglant Koçi.
Koçi rezultonte i zhdukur që prej datës 4 qershor, ndërsa identifikimi është bërë përmes krahasimit të profilit gjenetik me atë të nënës së tij.
Sipas ekspertizës, përputhshmëria ka rezultuar 100%, duke konfirmuar zyrtarisht identitetin e viktimës.
Më herët, nëna e 34-vjeçarit kishte deklaruar se trupi i gjetur në gjendje të avancuar dekompozimi i përkiste djalit të saj, pasi e kishte njohur nga një shenjë dalluese në trup.
Pas konfirmimit zyrtar, pritet që familjarët të tërheqin trupin nga morgu për t’i dhënë lamtumirën e fundit.
Eglant Koçi u gjet i pajetë pak ditë më parë në fshatin Cërunjë, mes Tiranës dhe Elbasanit, pas rreth dy javësh kërkimesh.
Në kuadër të hetimeve, policia ka shpallur në kërkim Armand Shakajn, i dyshuar si autor i ngjarjes dhe shok i ngushtë i viktimës.
Në zyrën e Shakajt, policia ka gjetur gjurmë baruti dhe një shenjë në mur, që dyshohet se është shkaktuar nga një predhë plumbi.
Sipas dyshimeve, 34-vjeçari është marrë peng mbrëmjen e 4 qershorit dhe më pas është vrarë.
Në burg ndodhet Enea Zyferi, kamarier në lokalin e Shakajt, i cili dyshohet se ka qenë dëshmitar i ngjarjes.
Hetimet kanë ngritur dyshime se automjeti tip “Porsche” i Shakajt është përdorur për transportimin dhe zhdukjen e trupit.
Policia dyshon gjithashtu se autori ka lëvizur motorin e viktimës për të humbur gjurmët, ndërsa mjeti u gjet më pas në rrugën “5 Maji” në Tiranë.
Kërkimet për kapjen e Armand Shakajt vijojnë, ndërsa nga verifikimet në sistemin TIMS rezulton se ai nuk ka dalë jashtë vendit.
