Dy punonjës të Institucionit të Ekzekutimit të Vendimeve Penale “Jordan Misja” në Tiranë kanë humbur jetën gjatë ushtrimit të detyrës.
Lajmi është bërë i ditur nga Drejtoria e Përgjithshme e Burgjeve, e cila njofton se ngjarjet kanë ndodhur brenda pak orësh, si pasojë e gjendjeve të papritura shëndetësore.
Viktimat janë Zog Muhametaj, Specialist i Informacionit me gradën Komisar, dhe Pëllumb Vrana, Teknik i Kamerave me gradën Kryeinspektor.
Sipas njoftimit, rreth orës 21:36 të datës 29 qershor 2026, Zog Muhametaj ka shfaqur probleme të rënda shëndetësore gjatë instruktazhit të stafit për ndërrimin e shërbimit.
Kolegët dhe personeli shëndetësor i institucionit i kanë dhënë menjëherë ndihmën e parë dhe e kanë transportuar me urgjencë drejt Spitalit Ushtarak.
Pavarësisht ndërhyrjes së mjekëve, Muhametaj nuk ka arritur të mbijetojë.
Pak orë më vonë, rreth orës 00:00 të datës 30 qershor, edhe Pëllumb Vrana ka pësuar një gjendje të rëndë shëndetësore gjatë ushtrimit të detyrës në ambientet e institucionit.
Ai është ndihmuar fillimisht nga kolegët dhe infermierja e institucionit, ndërsa më pas është dërguar me urgjencë drejt QSUT-së.
Rreth orës 01:00, pavarësisht përpjekjeve të mjekëve, Vrana ka ndërruar jetë.
Zog Muhametaj ishte pjesë e sistemit penitenciar që prej vitit 2015, ndërsa prej vitit 2023 shërbente në IEVP “Jordan Misja”.
Drejtoria e Përgjithshme e Burgjeve vlerëson kontributin e tij në detyrë dhe e cilëson si punonjës të përkushtuar e profesionist.
Pëllumb Vrana, në detyrën e Teknikut të Kamerave, ka kontribuar në funksionimin dhe sigurinë e institucionit.
Drejtoria e Përgjithshme e Burgjeve shpreh ngushëllime për familjarët dhe kolegët e dy punonjësve, duke vlerësuar shërbimin dhe përkushtimin e tyre në sistemin penitenciar.
