Elisa Spiropali duket se po ndërton një bazë të re politike larg zyrave të qeverisë. Burime të VNA bëjnë me dije se ish-kryetarja e Kuvendit prej disa javësh ka marrë me qira një ambient në zonën e ish-Bllokut, në pallatin ku ndodhet lokali “Cioccolati Italiani”.
Sipas të njëjtave burime, në katet e sipërme të ndërtesës Spiropali ka hapur një zyrë, ku gjatë javëve të fundit janë parë të hyjnë e të dalin disa ish-ministra të qeverisë Rama, të cilët aktualisht janë deputetë të grupit parlamentar socialist.
Me qëndrimet e saj të fundit, “mamica” nuk e ka fshehur mllefin ndaj “Skënderbeut” të saj politik, i cili e largoi nga posti i ministres së Jashtme. Pikërisht nga ai moment, që përbën një kthesë në karrierën e saj politike, duket se ka nisur edhe rebelimi i Spiropalit.
Pas më shumë se një dekade, gjatë së cilës që prej vitit 2013 ka mbajtur poste të rëndësishme në administratën e Rilindjes, Spiropali ka zgjedhur të shfaqë publikisht pakënaqësinë e saj. Statuset e gjata në rrjetet sociale, por edhe mungesa në seancën parlamentare ku Partia Socialiste u rreshtua në mbrojtje të mandatit të Belinda Ballukut, janë interpretuar si sinjale të qarta të një distance politike me qeverinë dhe kryeministrin.
Edi Rama, deri më tani, i ka bërë të qartë vijën e kuqe, të cilën Spiropali, të paktën publikisht, nuk e ka kaluar. Megjithatë, kjo nuk duket se e ka penguar të vazhdojë lëvizjet e saj politike, duke u ravijëzuar gjithnjë e më shumë si një zë disident brenda radhëve të Partisë Socialiste.
Ironia qëndron në faktin se bëhet fjalë për të njëjtën parti që Elisa Spiropali nuk mund t’ia mohojë meritën se e shndërroi, politikisht dhe publikisht, nga “rosaku i shëmtuar” në “mjellmën e hijshme”, me një imazh të kuruar dhe një profil të ndërtuar me kujdes. Tani mbetet për t’u parë nëse zyra e re në zemër të ish-Bllokut është thjesht një adresë pune… apo pika e nisjes së një kryengritjeje në pallat.
