Kryetari i Lëvizja Bashkë, Arlind Qori, i ftuar në emisionin “Të Paekspozuarit” në MCN TV, deklaroi se qytetarët shqiptarë kanë treguar një nivel të lartë emancipimi me protestën paqësore, ndërkohë që tha se pushteti po përgjigjet me dhunë, gjuhë agresive dhe banale, por shtoi se tashmë e vërteta ka dalë dhe nuk mund të manipulohet më.
“Ta nisim nga protesta e sotme. Ishte thelbi i gjithçkaje ka ndodhur në dy muaj protestë. Ata që e kanë vjedhur vendin, nga spitalet në jetimore, u përballën me mllefin e qytetarëve, veza është forma më e qytetëruar e protestës. Nëse në një vend tjetër të botës do të kishte kaq shumë mllef, të siguroj se nuk do hidheshin vezë, por gurë dhe shkopinj. Kjo tregon një nivel të lartë emancimi të Shqipërisë.
Ata që kanë pushtetin, çfarë nuk kanë bërë dhe nuk kanë thënë. Do ta nis nga Taulant Balla, mos gaboj, është drejtues i grupit parlamentar të PS, jo një Zeqine e rastit. Taulant Balla mes një mijë e një gomarllëqeve që ka thënë, ka thënë diçka problematike, i ka quajtur protestuesit terroristë. Nuk e kam dëgjuar në 36 vite pluralizëm në Shqipërië që një forcë politike i quan ata që ka përballë terroristë. Gjuha është shumë e rëndësishme. Po i the tjetrit terrorist, me të nuk ka as bisedë dhe asgjë. Pasi kur i thua dikujt terrorist ai meriton plumbin ballit. Kjo do të thotë se kjo parti ka për borxh jo vetëm të thotë gjithçka por edhe të bëjë gjithçka. Taulant Balla i quajti terroristë dhe nuk është rastësi që policia iu ndërsye vajzave dhe djemve të rinj, duke i marrë zvarrë dhe duke i goditur, edhe tre aktivistë të Lëvizja Bashkë mes tyre.
Italo Calvino një autor Italian, flet për dy qytete, të minjve dhe të dallandysheve. Minjtë dhe dallëndyshet ndryshojnë në kohë, kanë edhe raporte dinamike me njëri tjetrin. Një gjë nuk ndryshon, dallëndyshet duan gjithmonë të shpëtojnë nga minjtë.
Pra punëtorët, qytetarët, e me rradhë duan të shpëtojnë nga ata që përfitojnë nga qytetarët. Kjo që po ndodh në dy muaj, është ora e së vërtetës në Shqipëri. Asgjë nuk mund të manipulohet, fshihet dhe zbukurohet më. Prandaj gjuha e pushtetit është kaq agresive dhe banale. Si kurrë më parë ka dalë e vërtetë dhe kontradikta në shesh.
Dikush ka publikuar një foto të makianve të ujit të policisë dhe ana tejtër protestues. Dhe pyetja ishte, nga cila anë e gardhit je?
Dallëndyshet kanë zgjedhur formën më të qytetëruar të artikulimit të mllefit të vet, vezën. Shiko në Gjërmani, Britani, etj, dhe shiko çfarë ndodh në protesta. Ne ia kemi dalë të protestojmë masivisht dhe paqësisht, kjo duhet të na bëjë krenarë të gjithëve”, deklaroi Qori.
