Autoriteti i Konkurrencës ka vendosur masa dhe detyrime të reja ndaj operatorëve celularë Vodafone Albania SHA dhe One Albania SHA, pas përfundimit të hetimit të thelluar në tregun me pakicë të shërbimeve celulare.
Sipas vendimit të Komisionit të Konkurrencës, masat synojnë korrigjimin e problematikave të konstatuara gjatë hetimit dhe forcimin e mbrojtjes së konsumatorëve, përmes rritjes së transparencës, zgjerimit të mundësive të zgjedhjes dhe ofrimit të paketave më të përshtatshme për kategori të ndryshme përdoruesish.
Gjatë periudhës së hetuar, Autoriteti i Konkurrencës evidentoi rritje progresive dhe të ngjashme të çmimeve nga operatorët, ngjashmëri të lartë mes paketave të ofruara, reduktim të ofertave me çmime më të ulëta, si dhe mungesa në dokumentimin e kostove që justifikojnë ndryshimet tarifore.
Në bazë të vendimit të datës 24 korrik 2026, Vodafone Albania dhe One Albania duhet që brenda 90 ditëve të krijojnë paketa të veçanta dhe më të favorshme për pensionistët dhe studentët e moshës 18 deri në 23 vjeç.
Gjithashtu, operatorët do të jenë të detyruar që paketat më ekonomike të jenë të aksesueshme edhe në pikat fizike të shitjes dhe jo vetëm përmes aplikacioneve apo platformave online.
Vendimi parashikon se abonentët, pas përfundimit të kontratës, duhet të kenë mundësi të kalojnë në një paketë më të lirë pa penalitete dhe pa pengesa të pajustifikuara.
Po ashtu, çdo ndryshim në çmim, përmbajtje apo afat vlefshmërie të paketave duhet t’i komunikohet individualisht abonentit, në mënyrë të qartë dhe të paktën 30 ditë përpara hyrjes në fuqi.
Autoriteti ka përcaktuar gjithashtu se çdo rritje çmimi duhet të mbështetet në analiza të dokumentuara të kostove, të cilat operatorët duhet t’i ruajnë për një periudhë pesëvjeçare.
Sipas vendimit, paketat e reja duhet të kenë diferencim real dhe të mos kufizojnë zgjedhjen e konsumatorëve. Gjithashtu, kontratat standarde të operatorëve do t’i nënshtrohen vlerësimit paraprak të Autoritetit të Konkurrencës për të shmangur klauzolat e padrejta.
Vendimi përcakton edhe detyrimin për qartësimin e procedurave dhe afateve për bartjen e numrit nga një operator te tjetri, të cilat duhet të jenë të kuptueshme për abonentët.
Autoriteti i Konkurrencës bëri të ditur se zbatimi i këtyre masave do të monitorohet për një vit nga hyrja në fuqi e vendimit. Në rast të moszbatimit të detyrimeve, Vodafone Albania SHA dhe One Albania SHA rrezikojnë penalitetet e parashikuara nga legjislacioni në fuqi.
