Kryeministri Edi Rama ka reaguar pas përplasjes mes biznesmenëve Luan Muça dhe Vasil Bedinaj, duke njoftuar se qeveria do të shpronësojë zonën në Palasë ku parashikohej ndërtimi i një resorti.
Përmes një videoje të publikuar në rrjetet sociale, Rama e cilësoi konfliktin mes dy ndërtuesve si “banal dhe brutal”. Sipas tij, pas analizimit të situatës dhe hartës së pronësisë, qeveria ka vendosur t’i japë fund projektit të parashikuar në atë territor.
“Do ta shpronësojmë zonën në fjalë dhe do ta kthejmë në një ullishte”, deklaroi kryeministri.
Rama tha se vendimi synon të japë një mesazh për investitorët dhe operatorët që zhvillojnë apo menaxhojnë asete turistike në vend.
Sipas tij, sjellje të tilla dëmtojnë imazhin e Shqipërisë turistike dhe bien ndesh me atë që ai e cilësoi si një “mision të madh kombëtar”.
Kryeministri theksoi se të gjithë aktorët e sektorit, nga investitorët deri te punonjësit e shërbimit, duhet të sillen si ambasadorë të turizmit shqiptar.
Reagimi vjen pas konfliktit mes Muçës dhe Bedinajt për projektin turistik në Palasë, i cili tashmë rrezikon të mos realizohet, nëse procedura e shpronësimit e paralajmëruar nga qeveria vihet në zbatim.
