Autoriteti Rrugor Shqiptar i ka dhënë kompanisë “2 T” një kontratë me vlerë 1.3 miliardë lekë, ose rreth 14.3 milionë euro, për mirëmbajtjen e akseve kryesore të Rajonit Qendror dhe Juglindor.
Kontrata do të zgjasë katër vjet dhe përfshin rehabilitimin dhe mirëmbajtjen periodike të disa prej rrugëve kryesore në juglindje të vendit. Por ajo që ngre pikëpyetje është mënyra se si është zhvilluar procedura: në garë është paraqitur vetëm kompania “2 T”.
Në mungesë të çdo rivali, ARRSH-ja, e drejtuar nga Ami Kozeli, e ka shpallur fituese kompaninë e Artan Sakos. Oferta e paraqitur arrin në rreth 99.95% të fondit limit, duke konsumuar pothuajse të gjithë shumën e vendosur në dispozicion.
Pra, për një kontratë katërvjeçare me vlerë 14.3 milionë euro pati vetëm një ofertues dhe thuajse asnjë kursim nga fondi limit. Këto të dhëna ngrenë pikëpyetje nëse mungesa e konkurrencës lidhet vetëm me mosinteresimin e kompanive të tjera apo me kushtet e vendosura në procedurë.
Tenderi merr një rëndësi më të madhe për shkak të historikut të kompanisë fituese. “2 T” dhe bashkëpronari i saj, biznesmeni Artan Sako, kanë përfunduar në vëmendjen e SPAK-ut gjatë hetimeve për kontratat e infrastrukturës rrugore dhe lëvizjet financiare të lidhura me to.
Sako është marrë në pyetje nga SPAK më 19 nëntor 2024, ndërsa në fund të janarit 2026 agjentët e Byrosë Kombëtare të Hetimit kanë ushtruar kontrolle në ambientet e kompanisë “2 T”.
Në fokusin e hetuesve kanë qenë disa procedura me vlerë dhjetëra milionë euro, përfshirë kontrata për segmente të Unazës së Madhe të Tiranës. Një prej tyre është tenderi rreth 23 milionë euro për Lotin 7 të Unazës së Jashtme, ku rezulton e përfshirë edhe kompania “2 T”.
Sipas të dhënave të kontratave publike, vetëm gjatë pesë viteve të fundit kompania ka përfituar mbi 110 milionë euro nga institucionet shtetërore, duke u kthyer në një prej përfituesve të mëdhenj të fondeve të infrastrukturës.
Hetimet për tenderat e rrugëve përfshijnë edhe ish-drejtorin e ARRSH-së, Evis Berberi, i arrestuar në mars 2024 dhe i akuzuar nga SPAK për korrupsion pasiv dhe pastrim parash. Dosja e tij ka nxjerrë në pah marrëdhëniet mes zyrtarëve të Autoritetit Rrugor dhe kompanive private që merrnin kontrata publike.
Por edhe pas largimit të Berberit dhe ndryshimit të drejtuesve, mënyra e zhvillimit të tenderave vijon të prodhojë të njëjtën pamje: kontrata me vlera të larta, konkurrencë minimale dhe oferta shumë pranë fondit limit.
Sot ARRSH-ja drejtohet nga Ami Kozeli, një tjetër ish-vartës i Belinda Ballukut. Pikërisht nën drejtimin e tij, institucioni i ka dhënë 14.3 milionë euro kompanisë “2 T”, në një procedurë ku nuk pati asnjë ofertues tjetër dhe ku çmimi fitues ishte thuajse i barabartë me shumën maksimale të parashikuar.
Fakti që një biznesmen merret në pyetje apo që kompania e tij kontrollohet nga organet hetimore nuk provon fajësi dhe nuk e përjashton automatikisht subjektin nga tenderat. Megjithatë, kur një kontratë e tillë jepet me vetëm një ofertues dhe pa kursim real të fondit, ARRSH-ja ka detyrimin të shpjegojë se si u garantua konkurrenca dhe përdorimi me eficiencë i parave publike.
Në fund, bëhet fjalë për 1.3 miliardë lekë nga fondet publike dhe për një institucion që prej vitesh është shoqëruar nga hetime dhe akuza për mënyrën e dhënies së kontratave të rrugëve.
Drejtuesit e ARRSH-së ndërrohen, por tenderat vazhdojnë të fitohen pa rivalë, me oferta në kufijtë e fondit limit dhe shpesh nga të njëjtat kompani. Nëse ky model përsëritet pavarësisht emrit që qëndron në zyrën e drejtorit, atëherë problemi nuk është vetëm te drejtuesit, por te skema që vazhdon të funksionojë pas tyre. Gazeta Korrieri
