Kryeministri Edi Rama ka njoftuar një ndryshim në kabinetin qeveritar, duke larguar Besfort Lamallarin nga drejtimi i Ministrisë së Brendshme.
Rama bëri të ditur se Lamallari do të vijojë të jetë pjesë e ekipit të tij në Kryeministri.
“Sot kam vendosur të bëjmë një lëvizje në skuadrën që është në fushë. Lamallari nga drejtimi i Ministrisë së Brendshme kalon në stolin tim, bashkë me mua dhe ekipin këtu në Kryeministri”, deklaroi Rama.
Drejtimin e Ministrisë së Brendshme do ta marrë Ervin Demo, i cili aktualisht mban detyrën e ministrit të Shtetit për Pushtetin Vendor.
Sipas Ramës, Demo do të mbulojë punët e brendshme, ndërsa çështjet e pushtetit vendor do të integrohen në strukturën e Ministrisë së Brendshme.
Kryeministri theksoi se bashkimi i këtyre përgjegjësive nuk është i ri në historikun e këtij dikasteri.
