Oligarku Samir Mane është paraqitur këtë të mërkurë në Prokurorinë e Posaçme, në kuadër të hetimeve që lidhen me dosjen “Balluku” dhe më konkretisht me vilën luksoze në kompleksin “Green Coast” në Palasë.
Mane ka mbërritur në ambientet e SPAK rreth orës 18:00, ndërsa gjatë ditës së sotme në Prokurorinë e Posaçme janë paraqitur edhe arkitektët Alban dhe Olsi Eftimi, dy drejtuesit e studios “Atelier 4”. Burime bëjnë me dije se prania e tyre lidhet me verifikimet që SPAK po kryen për vilën nr. 188/1 në Palasë, pronë e sekuestruar nga Prokuroria e Posaçme dhe për të cilën hetuesit dyshojnë se zotërohej faktikisht nga ish-zëvendëskryeministrja Belinda Balluku.
Emri i “Atelier 4” është shfaqur në dosjen hetimore për shkak të materialeve, projekteve dhe komunikimeve elektronike që lidhen me këtë vilë. Sipas të dhënave të publikuara nga dosja, në kompjuterët e studios janë gjetur preventivë, planimetri dhe dokumente që lidhen me arredimin dhe punimet në vilën e Palasës.
Në qendër të hetimit janë edhe komunikimet e Alban Eftimit me Ballukun. Në një email të shtatorit 2020, Eftimi i dërgonte ish-zv.kryeministres rishikime të projektit dhe detaje të arredimit të pronës, duke përfshirë pishinën “infinity”, vaskat hidromasazhi, përdorimin e drurit “teak” dhe mermerit. Një tjetër komunikim përmbante planimetritë dhe projektet e dy vilave.
Sipas SPAK, vila deri në fazën e karabinasë dyshohet se ishte financuar nga ish-futbollisti Igli Tare, ndërsa punimet e mëtejshme dhe pishina dyshohet se janë financuar nga biznesmeni Arbër Abazi, administrator i “Alko Impex General Construction”. Në dokumentet e sekuestruara në “Atelier 4”, sipas raportimeve mbi dosjen, rezultojnë pagesa të kompanisë së Abazit në vlera që shkojnë nga 288 mijë deri në 410 mijë euro.
Pikërisht lidhja e kësaj prone me kompleksin “Green Coast”, ku është ndërtuar vila e sekuestruar, e sjell në fokus edhe emrin e Samir Manes. Më herët, BKH ka ushtruar kontrolle në vilën dhe zyrat e biznesmenit, ndërsa gjatë kontrollit është sekuestruar edhe telefoni i tij celular. Në atë fazë, hetimet lidhnin emrin e Manes me verifikimet për investime të dyshuara në projektin “Green Coast” në Palasë.
Paraqitja e Manes sot në SPAK, pas marrjes në pyetje të vëllezërve Eftimi, tregon se Prokuroria e Posaçme po zgjeron rrethin e personave që mund të kenë dijeni për mënyrën si është porositur, projektuar, financuar dhe finalizuar vila që SPAK dyshon se është pasuri e fshehur e Belinda Ballukut.
Dosja ndaj ish-zv.kryeministres përfshin dyshime për korrupsion, pastrim parash dhe fshehje pasurie. Deri në këtë fazë bëhet fjalë për dyshime të organit të akuzës dhe jo për përfundime gjyqësore të formës së prerë.
