Kompania “Albavia”, e cila punoi në një nga lotet e rrugës Qukës–Qafë Plloçë, është shpallur fituese e një tenderi të ri nga Autoriteti Rrugor Shqiptar.
Drejtori i ARRSH-së, Ami Kozeli, ka shpallur më 16 shtator 2026 kompaninë fituese për rikonstruksionin e rrugës së vjetër Kombinat–Ndroq–Plepa, loti i dytë.
Procedura kishte një fond limit prej 1,177,556,901 lekësh, ose rreth 12,5 milionë euro, ndërsa afati për realizimin e punimeve është 24 muaj.
“Albavia” paraqiti një ofertë prej rreth 765 milionë lekësh dhe u rendit e para në bazë të sistemit të pikëzimit.
Oferta e saj nuk ishte më e ulëta në garë.
Kompania “Eurokos Holding” ofroi 701 milionë lekë, ndërsa “Rafin” rreth 742 milionë lekë, por të dyja u vlerësuan me zero pikë.
Në këtë procedurë, përveç çmimit, që përbënte 60 pikë, u vlerësuan edhe metodologjia e punës, stafi, masat për uljen e ndikimit në mjedis dhe garancia.
“Albavia” do ta realizojë projektin me mbështetjen e kompanive “Joos Krasniqi–Baze”, “C.A.A.”, “Saimir Poka” dhe “Re-CH Project”.
Rikthimi i kompanisë në tenderat e ARRSH-së vjen pavarësisht problematikave dhe vonesave që shoqëruan ndërtimin e rrugës Qukës–Qafë Plloçë.
Në atë aks, ku “Albavia” kishte një nga lotet, u raportuan shembje të segmentit ende pa u marrë plotësisht në dorëzim.
Kompania zotërohet në masën 52% nga Hasan Hafizi dhe 48% nga Shkëlqim Rakipaj.
Bashkëshortja e aksionerit kryesor, Mimoza Hafizi, ka qenë më herët deputete e Partisë Socialiste.
Sipas bilancit të vitit 2025, “Albavia” deklaroi një fitim prej rreth 115 milionë lekësh, ose afro 1,2 milionë euro./korrieri
