Gazetari Lutfi Dervishi ka treguar një bisedë që, sipas tij, ish-presidenti amerikan Bill Clinton ka zhvilluar me Hashim Thaçin gjatë një takimi në Nju Jork.
Dervishi tha në A2 CNN se Clinton e kishte këshilluar Thaçin të mos përpiqej të arrinte personalisht një marrëveshje me Rusinë për çështjen e Kosovës.
Sipas tij, ish-presidenti amerikan i kishte shpjeguar se kjo çështje mund të zgjidhej vetëm si pjesë e një marrëveshjeje më të gjerë ndërmjet Shteteve të Bashkuara dhe Rusisë.
“Mos u përpiq ti si person të bësh marrëveshje me Rusinë, sepse çështja e Kosovës zgjidhet si pjesë e një pakete kur SHBA-ja të bëjë një marrëveshje me Rusinë”, citoi Dervishi këshillën e Clintonit për Thaçin.
Gazetari shtoi se, në raportet mes dy fuqive, Kosova nuk konsiderohet një çështje qendrore.
Dervishi komentoi edhe kërkesat për zhbërjen e Gjykatës Speciale, ku po gjykohen Hashim Thaçi dhe ish-drejtues të tjerë të Ushtrisë Çlirimtare të Kosovës.
Sipas tij, zhbërja e kësaj gjykate mund të realizohet vetëm nga ata që ndikuan në krijimin e saj.
“Shumë mirë të zhbëhet Gjykata Speciale, por këtë gjykatë e zhbëjnë ata që e bënë”, deklaroi Dervishi.
Ai theksoi se vetëm Shtetet e Bashkuara mund ta ndërmarrin një nismë të tillë, nëse do të kishin interes për ta bërë këtë.
Dervishi iu referua më pas raportit të forcave në politikën ndërkombëtare, duke cituar historianin e lashtë grek Tuqididi.
Sipas tij, edhe sot vijon të vlejë parimi se të fuqishmit bëjnë atë që munden, ndërsa më të dobëtit detyrohen të përballojnë pasojat.
